Бүлүү олохтоохторо байыастарыгар көмө ыыттылар
![](https://sakha-sire.ru/wp-content/uploads/2024/07/izobrazhenie-whatsapp-2024-07-25-v-18.13.49_9f5b6a25-900x596.jpg)
Бүлүү улууһун «Харысхал» хамсааһына анал байыаннай дьайыыга сылдьар уолаттарга тиһигин быспакка тус баһыылкалары, аһы-үөлү ыытар.
Бэс ыйын саҕаланыыта ыыппыт баһыылкаларын туппуттарын туһунан иһитиннэрбиттэрин кэннэ, тута бу ый 20 күнүгэр 230 кг, 23 анал аадырыстаах баһыылканы оҥорон ыыттылар. Бу сырыыга уолаттар бэйэлэрин сакааһынан маскировочнай сиэккэлэри баайбыттар.
Улуус Кыhыл-Сыыр, Чинэкэ, Чочу, Өкүндү, Илбэҥэ нэһилиэктэриттэн уонна Бүлүү куоратыттан араас көмөлөр киирбиттэр. Арассыыйа норуотун маастара Николай Степанов Бүлүү эбэ тааһыттан, бэйэтэ уһаарбыт тимириттэн анал быһах оҥорон ыытта. Илбэҥэ баһылыга Егор Афанасьевич этиҥ түспүт маһын ыыппытыттан, мас ууһа Иннокентий Акимов харысхаллары оҥорон, ууруна суруктаан сырыы аайы ыытар буолла.
Чочу уонна Чинэкэ, Бүлүү куоратын бэтэрээннэрэ, Бүлүү балыыһатын кэлэктиибэ, Сосновка интэринээтин кыргыттара, Кыһыл-Сыыр «Сила горячих сердец» түмсүүтэ уолаттарга хас биирдиилэригэр тиксэр гына маскировочнай сиэккэлэри баайан ыыттылар. Бу сиэккэлэр билиҥҥи тыҥааһыннаах кэмҥэ олус туһалаахтарын уонна наадалаахтарын өйдөөн көмөлөспүт дьонноругар волонтердар хамсааһыннара махтанар.
«Оҕолорбут чэгиэн сырыттыннар диэн бэйэбит оҥорбут маастарбытын үһүс төгүлүн ыыттыбыт. «Күн Эко» лааҕыр оҕото, гимназия үөрэнээччитэ Лиза А. хомуйбут эмтээх отторун хаһыс да төгүлүн маастарга, битэмииннээх чэйдэргэ Отоһут Өрүүнэбит отторун кытта холбоон, «Кыайыы вальсын» кыайыылааҕа Розалия Павловна биэрбит ытын сыатыттан оҥоһуллубут мааһын эмиэ ыыттыбыт. Бу маны барытын үллэрэн ыытар иhиппитин –2-с №-дээх эмтиэкэ босхо биэрэн көмөлөһөр. Өкүндү бэтэрээннэрэ бородуукта арааһын, туттар сээкэйдэри хомуйан биэрбиттэрэ. Бүлүү куоратын «Ыллык», «Хаһаайыска», «АйЛаана», «Айылгы» түмсүүлэрэ, анал байыаннай дьайыыга сылдьар уолаттар ийэлэрэ, кэргэттэрэ, чугас дьонноро илии сылааһынан көмөлөрүн ыыттылар. В.О Каратаев-Харатай Баһылай аатын сүгэр Олоҥхо норуодунай кэлэктиибэ ыһыахха ылбыт «Кылаан кыайыылааҕа» бириистэрин – 50000 солк. суумалаах харчынан уолаттарга 4 устуука көмүскэнэр ачыкы, 1 устуука дизель атыылаһан ыыттыбыт. Итини барытын Дьокуускайга диэри таксист Альберт Тимофеев босхо илдьэн биэрбитин, Дьокуускайга баар волонтёрбут Л.П. Иванова көрсөн дьаһайда», — диэн Светлана Иванова кэпсээтэ.
Күүс-көмө, тирэх буолан илиилэрин сылааһынан угуттаан көмөлөспүт бар дьонноругар «Харысхал» хамсааһын муҥура суох махталын тиэрдэр. Ийэ-аҕа сылаас сыһыаннара, эбээ-эһээ эйэҕэс мичээрдэрэ, эдьиий-убай элэккэй майгылара, балыс-быраат былааннаах көмөлөрө уолаттарбытын харыстыы, араҥаччылыы, арчылыы сырыттын диэн алгыс тылларын аныыллар.
![](https://sakha-sire.ru/wp-content/uploads/2024/07/izobrazhenie-whatsapp-2024-07-25-v-17.55.59_3cecbff8.jpg)
![](https://sakha-sire.ru/wp-content/uploads/2024/07/izobrazhenie-whatsapp-2024-07-25-v-18.13.43_c46c5f62.jpg)
![](https://sakha-sire.ru/wp-content/uploads/2024/07/izobrazhenie-whatsapp-2024-07-25-v-18.13.45_cf59d2af.jpg)
![](https://sakha-sire.ru/wp-content/uploads/2024/07/izobrazhenie-whatsapp-2024-07-25-v-18.13.49_9f5b6a25.jpg)
![](https://sakha-sire.ru/wp-content/uploads/2024/07/izobrazhenie-whatsapp-2024-07-25-v-18.13.50_f9685f26.jpg)
Сообщить об опечатке
Текст, который будет отправлен нашим редакторам: