Быыбарга кыттыы 74,22 %
![](https://sakha-sire.ru/wp-content/uploads/2024/03/img_2521-1060x596.jpg)
Быыбар киин хамыыһыйата иһитиннэрбитинэн, быйыл быыбарга кыттыы бырыһыана хаһааҥҥытааҕар да үрдүк. Куоластааччылар 73,33 % быыбардыыр учаастактарга кэлэн куоластаатылар. Оттон электроннай куоластааһыны ааҕан туран, быыбарга кыттыы 74,22 бырыһыаҥҥа тэҥнэспит.
Бу маннык көстүү Арассыыйа бэрэсидьиэнин быыбарын историятыгар биирдэ эрэ буола сылдьыбыта. 1991 сыллаахха бэс ыйын 12 күнүгэр Арассыыйа олохтоохторо аан бастакыларын бэрэсидьиэннэрин талбыттара. Куоластааччылар 74,66 % тахсан быыбардаабыттара.
Саамай элбэх быыбардааччы Чечня Өрөспүүбүлүкэтигэр тахсыбыт. Олохтоохтор 96,46 бырыһыан быыбардаабыттар. Итини таһынан 90-тан тахса бырыһыаны Кабардино-Балкария, Тува, Ямало-Ненецкэй автономнай уокурук, Хотугу Осетия көрдөрбүттэр. Оттон Саха сирин олохтоохторо 69,03 бырыһыаннара тахсан куоластаатылар.
Аҕыйах сылтан бэттэх электроннай куоластааһын диэн киирбитэ. Быйылгы быыбарга бу ньыманы Арассыыйа 89 эрэгийиэниттэн 29-гар туһаннылар. Электроннай куоластааһыҥҥа барыта 4,7 мөлүйүөн киһи кыттыбыт.
Саҥа эрэгийиэннэргэ быыбар хайдах ааста диир буоллахха, быйыл Донецкай, Луганскай Народнай Өрөспүүбүлүкэлэр, Запорожье, Херсон уобаластарын олохтоохторо Арассыыйа бэрэсидьиэнин быыбарыгар бастакыларын кытталлар. Бу түөрт эрэгийиэҥҥэ быыбарга кыттыы 80-тан тахса бырыһыан.
Оттон тас дойдуларга быыбардааһыны ылан көрдөххө, быйыл 114 дойдуга быыбардыыр учаастактар аһыллыбыттара. Холобур, Турцияҕа кулун тутар 6-12 күннэригэр Измирга, Бурсаҕа, Аланияҕа, Кемергэ, Мармариска, ону сэргэ “Аккую Нуклеар” диэн Арассыыйа Турцияҕа тута сылдьар атомнай станциятын былаһааккатыгар эрдэ куоластааһын ыытыллыбыта. Кулун тутар 17 күнүгэр Анкараҕа, Стамбулга, Трабзоҥҥа быыбардыыр учаастактар үлэлээбиттэрэ.
Ыспыраапка быһыытынан эттэххэ, Арассыыйа үрдүнэн уонна тас дойдуларга барыта 114,2 мөлүйүөнтэн тахса быыбардааччы баар. Барыта 93,9 тыһыынчаттан тахса учаастак аһыллыбыта. Ол иһигэр 269 учаастак тас дойдуларга. Быыбар үс күн устата ыытыллыбыта, кулун тутар 15-17 күннэригэр. Эрдэ куоластааһын олунньу 25 күнүттэн кулун тутар 14 күнүгэр диэри буолбута. Манна үксүн киин сиртэн ыраах, суола-ииһэ суох нэһилиэнньэлээх пууннар олохтоохторо, табаһыттар, сылгыһыттар, ваахта ньыматынан үлэлии сылдьар дьоннор, ону таһынан байыаннай балаһыанньа биллэриллибит эрэгийиэннэригэр олорор быыбардааччылар куоластаабыттара.
Сообщить об опечатке
Текст, который будет отправлен нашим редакторам: