Дьокуускайга оҕолор кыттыылаах икки суол саахала таҕыста

Икки күн иһигэр Дьокуускайга сокуоннай саастарын ситэ илик оҕолор кыттыылаах икки суол быһылаана регистрацияланна. Бу туһунан киин куорат Гоставтоинспекцията иһитиннэрэр.

Бээтинсэҕэ, бэс ыйын 14 күнүгэр, киэһэ киин куорат Бестужев аатынан уулусса 9/2 №-дээх дьиэтин таһыгар «Toyota Land Cruiser»  массыына суоппара бэлисипиэдинэн айаннаан испит 2005 сыллааҕы оҕону түҥнэри көттө. Оҕоҕо амбулаторнай эмтэнии ананна.

Бэҕэһээ, бэс ыйын 15 күнүгэр, Маганскай перекресток уулуссатын 1 №-дээх дьиэтин таһыгар 1978 с. төрүөх суоппара улахан таһаҕаһы тиэйэр «Ивеко-AMT» массыынанан «Тойотая Премио» массыынаны кытта харсыста. Саахал миэстэтигэр кэлбит суһал көмө биригээдэтэ 2012 с. сокуоннай сааһын ситэ илик пассажиры балыыһаҕа киллэрдэ. Саахал тахсыбыт чахчытынан бэрэбиэркэ ыытыллар.