Сунтаардар Курскайга тиийэн биир дойдулаахтарын көрүстүлэр

Сунтаар улууһун баһылыга Анатолий Григорьев салайааччылаах волонтерскай этэрээт Москваҕа тиийэн наадалаах тэриллэри атыылаһан баран, бу күннэргэ Курскайга тиийдилэр. Бу туһунан  улуус дьаһалтата иһитиннэрдэ.

Курскайга барыахтарын иннинэ  сулууспалыы сылдьар уолаттары кытта кэпсэтэн, туохха наадыйалларын ыйыталаһан халыҥ испииһэк оҥоһуллубута.

— Курскайтан чугас куоракка сулууспалыы сылдьар сэттэ уол баар. Кинилэр ааттарыттан, икки уол көҥүллэтэн кэлэн, волонтердары көрүстүлэр. Байыастар сакаастаабыт тэриллэрин кытта дьиэ аһын, эйэҕэс эбээлэр тигэн, өрөн таһаарбыт хаххалыыр сиэккэлэрин туттардылар. Уолаттар маскировочнай сетка олус наада диэн дойдубут үтүө санаалаах дьонугар махтанабыт диэн этэллэр. Курскайга өссө икки биир дойдулаахтарбытын көрүстүлэр.
Улуус салалтатын өттүттэн маннык сырыы олус көдьүүстээх. Араас сыаналаах, наадалаах тэриллэринэн хааччыйалларын таһынан аҕалыы алҕаан, кыһалҕаларын миэстэтигэр быһаарсан, дойдуларын сонунун кэпсээн, ахтылҕаннарын уҕарыталлар, — диэн улуус дьаһалтатын пресс-сулууспата иһитиннэрдэ.