Өлүөнэ күргэтин тутуу Владимир Путин мунньаҕын биир боппуруоһунан буолла

Тохсунньу 17 күнүгэр, сэрдэҕэ, Владимир Путин видео-кэмпириэнсийэнэн Бырабыыталыстыба чилиэннэрин кытта мунньах ыытта. Мунньах биир тиэмэтинэн Өлүөнэ өрүһү туоруур күргэни тутуу буолла.

Арассыыйа бэрэсидьиэнэ, күргэ тутуутугар үп биэс сылга ууруллубутун ыйан туран, бырайыак түһүмэҕин туһунан билиһиннэрбит вице-премьер Марат Хуснуллин иһитиннэриитин иһиттэ.

“Биһиэхэ бу боппуруос, Владимир Владимиович, быһаарыллан турар, тутар ирдэнэр” – диэн Марат Хуснуллин эттэ.

Ил Дархан Айсен Николаев бу сыл бастакы кыбаарталыгар Өлүөнэ күргэтин тутуута саҕаланыаҕын туһунан эрдэ иһитиннэрэн турар. Өрүс хаҥас өттүгэр сүрүн түһүмэх үлэтэ саҕаланарыгар былаһаакка бэлэмнэммитэ – уот, сибээс уонна гаас ситимнэрин уларытан оҥорбуттара. Кытыл уҥа өттүгэр үлэ салҕанар.

Өлүөнэ өрүс күргэтэ экэниэмикэ түргэн тэтимнээхтик үүнүүтүн уонна тырааныспар сибээһин үрдэтэр национальнай соругун ситиһиитин хааччыйар  сүрүн бырайыак быһыытынан дойду суолга үлэтин биэс сыллааҕы былааныгар уонна Уһук Илин социальнай-экэнэмиичэскэй сайдыытын национальнай бырагырааматыгар киирбитэ.

Өлүөнэ күргэтэ тутулуннаҕына Саха сиригэр тырааныспар сырыыта 20-тэн 87%  диэри эбиллиэҕэ. Хотугу таһыыга сыллааҕы бүддьүөтү кэмчилээһин 7 млрд. солк. кырата суох буолуоҕа.

Ил Дархан уонна Бырабыыталыстыба пресс-сулууспата.