Өспөхтөр байыастарга көмөлөһөллөр

Уус Алдан улууһун Өспөх нэһилиэгин олохтоохторо байыаннай дьайыыга сылдьар байыастарга көмөлөрүн салгыыллар. Кинилэр «Доброволецтар» диэн  волонтердар хамсааһыннарын (сал. Светлана Архипченко, Дьокуускай) филиала буоланнар, хаххалыыр сиэккэни баайыынан дьарыктаммыттара сыл буолбут.

Бу туһунан биһиэхэ нэһилиэк баһылыга Лена Михайловна Свешникова кэпсиир:

— Бүгүҥҥү күҥҥэ барыта 1487 кв.м. иэннээх 126 устууканы баайдыбыт. 2,5 х 1,5 кв.м. биир киһиэхэ аналлаах илим – 33 устуука, барыта — 123,75 кв.м, онтон атына – тиэхиньикэҕэ туттуллар 3 х 5 м кээмэйдээхтэр. Баайыллан бэлэм буолбуту доброволецтар ыстааптарыгар илдьэн туттарабыт. Манна массыынанан буор босхо таһар уолаттарбытыгар махтанабыт. Тэрилтэлэрбит үлэһиттэрэ турунан күүскэ көмөлөһөллөр. Ол курдук оскуола кэлэктиибэ, оҕолор бары бииргэ түмсэн баайаллар, култуура тэрилтэтэ, амбулатория үлэһиттэрэ хаалсыбаттар. Дьиэҕэ олорор аҕам саастаахтарбыт сэргэхсийэ таарыйа кэлэн баайаллар. Сайыҥҥы кэмҥэ тирэхтэри дьиэ таһыгар аҕалан туруоран баайдыбыт. Куораттан сайылыы кэлбит биир дойдулаахтарбыт сайын устата эмиэ баайан көмөлөстүлэр, үөрэннилэр.

Былырыын аан бастаан саҕалыырбытыгар урбаанньыттар Лукин Г.В., Бурнашев П.И., Павлов Е.В. матырыйаал буларбытыгар 150 тыһ. солк. көмөлөспүттэрэ. Билигин филиал буоларбытынан, матырыйаалы доброволецтар булан-талан биэрэллэр. 49 филиалы матырыйаалынан хааччыйарга элбэх үп, сыра барар. Онон спонсор буларга көмөлөһөбүт, сороҕор бэйэбит хомуйан ыытабыт. Ол курдук быйыл саас нэһилиэнньэ – 68,7 тыһ.солк. көмөлөстө, сайын урбаанньыттар Лукин Г.В., Жирков Г.М., Егоров Т.Т., “РК РИМ” ХЭУо көмөлөрүнэн — 80,0 тыһ.солк матырыйаалга счет төлөммүтэ.

Доброволецтар байыастарга тиһиктээхтик көмөлөһөллөр. Харыстыыр, хаххалыыр сиэккэни таһынан чүмэчини, аһы-үөлү, эми-тому, бэйэлэрэ тикпит сылаас көстүүмнэрин, араас инструменнары, дрон саппааһын, о.д.а. сайаапканан ыыталлар. Нэһилиэктэн хантараагынан барбыт уолбутугар көмөлөһөн эбии эмп-томп, сылаас таҥас, илим биэрбиттэрэ. Онон түгэнинэн туһанан “Доброволецтар” волонтердар хамсааһыннарыгар махтанабыт, кинилэртэн элбэххэ үөрэнэн, кинилэри кытта кыттыһан волонтер буоламмыт, байыастарбытыгар көмөлөһөбүт. Инники күөҥҥэ сылдьар уолаттар кыһалҕаларын быһаарарга күннэри-түүннэри түбүгүрэр волонтердар баалларын олус сөҕөбүт уонна кинилэргэ сүгүрүйэбит.

Саас эмиэ бары кыттыһан уолбутун 84,0 тыһ. солк. таҥаһын-сабын тэрийэн ыыппыппыт. Маны барытын отчуоттаан иһэбит. Бүгүҥҥү күҥҥэ тепловизордаах дрон ылан биэрэргэ эмиэ хомуйан саҕалаатыбыт. Нэһилиэкпит олохтоохторугар, биир дойдулаахтарбытыгар махталбыт муҥура суох. Ыраах, кырыы, аҕыйах ахсааннаах нэһилиэк да буолларбыт дойдубут кыһалҕатыттан туора турбаппыт, кыайыыга кылааппытын киллэрсэрбитинэн киэн туттабыт, — диэн этэр Өспөх нэһилиэгин баһылыга Л.М.Свешникова.

Хаартыскалар Л.Свешникова тиксэриилэрэ.