Госдуумаҕа вейптэри бобор сокуон барылын киллэрдилэр
09.04.2024, 17:22
Хаартыска: ТАСС
Бөлөххө киир:
Госдуумаҕа никотиновай уонна никотина суох вейпы — электроннай табаҕы букатын бобор туһунан сокуон барылын киллэрдилэр. Бу сокуон барылын ЛДПР, КПРФ, «Сиэрдээх Арассыыйа — Кырдьык туһугар», «Новые люди» баартыйалар дьокутааттара киллэрбиттэр диэн ТАСС суруйар.
Бу сокуон барылын көҕүлээччилэртэн биирдэстэрэ, Госдуумаҕа үлэ, социальнай бэлиитикэ, бэтэрээннэр дьыалаларыгар кэмитиэти салайар Ярослав Нилов этэринэн, билигин илии баттааһыны хомуйа сылдьаллар, юридическэй боппуруостарга сүбэлэттэрэллэр.
Дьокутааттар этэллэринэн, вейпы тардар оҕо ахсаана, 2011 сылы кытта тэҥнээтэххэ, 10 төгүл эбиллибит. «Вейп диэн доруобайаҕа куттала суох» диэн дойҕоҕу тарҕатан, байар эрэ туһуттан, оҕолорго эмиэ атыылыыллар. Онон оҕолор буортута суох дии саныыллар, кинилэргэ муода буолла. Дьиҥэ, оҕоҕо атыылыыр бобуулаах эрээри, атыыһыттар ону аахсыбаттар.
Ол эрээри, электроннай сигарета, никотиннаах да, никотина да суох буоллун, киһи доруобуйатыгар уонна тулалыыр дьоҥҥо улахан буортуну аҕалар. Ону тэҥэ, табахха курдук, тутулук үөскүүр.
Никотина суох убаҕастаах вейп эмиэ буортулаах, тоҕо диэтэр, глицерин, пропиленгликол, ароматизатор, о.д.а. химическэй бэссэстибэлэртэн турар. Тыҥаҕа куһаҕаннык дьайар, аҕыйах сылынан, ыарыы үөскүүр.
«Үүнэр көлүөнэ доруобуйатын харыстыыр сыалтан, федеральнай таһымҥа вейптэри атыылыыры толору боборго этии киллэрэбит. Бу федеральнай бүддьүөккэ ороскуоту аҕалыа буолан баран, ыччат, норуот доруобуйатын харыстааһын быдан улахан суолталаах», — диэн дьокутааттар этэллэр.
+1
6
+1
+1
+1
+1
+1
+1
1
Сообщить об опечатке
Текст, который будет отправлен нашим редакторам: