Ленинград блокадатын кыттыылаахтарыгар анал бэлиэлэри туттардылар

Ленинграды блокадаттан босхолооһун 80 сылыгар Дьокуускайга олорор блокада кыттыылаахтарыгар анал бэлиэлэри туттардылар. Ол курдук, Анатолий Сергеевич Макушин, Олег Петрович Иванов, Анна Петровна Захарова, Антонина Александровна Припузова, Эльвира Давыдовна Ушницкая «Ленинграды фашистскай блокадаттан босхолооһун 80 сылынан» Санкт-Петербург куорат бырабыыталыстыбатыттан  бочуоттаах бэлиэлэри туттулар.

Наҕараадалааһын «Арассыыйа — мин устуоруйам» түмэлгэ буолла. Бочуоттаах бэлиэлэри үлэ, социальнай сайдыы миниистирэ Елена Волкова туттарда.

Патриотическай тэрээһиҥҥэ Ил Түмэн бэрэссэдээтэлин солбуйааччы Александр Подголов, Дьокуускай куорат думатын бэрэссэдээтэлэ Альберт Семенов, Сэрии, үлэ, сэбилэниилээх күүстэр уонна быраабы харыстыыр уорганнар бэтэрээннэрин уопсастыбаннай түмсүүлэрин бэрэссэдээтэлэ Вильям Иванов уонна Ленинград блокадатын кыттыылаахтарын оҕолоро, сиэннэрэ, сэрии кэмин оҕолоро, устудьуоннар, үөрэнээччилэр кытыннылар.

Түмэлгэ «80 фактов о блокаде» мультимедийнай быыстапка буола турар. Быыстапка олунньу 25 күнүгэр диэри буолуоҕа.

Маны тэҥэ, бу тэрээһин кыттыылаахтарыгар «Разин Леонид Георгиевич — главный диспетчер Дороги Жизни, обеспечивающей связь блокадного города с Большой землей» диэн документальнай киинэни көрдөрдүлэр. Уус-уран дьүһүйүүлэр, хоһоон ааҕыыта буолла.

«Ленточка Ленинградской Победы» аахсыйа чэрчитинэн, оливковай лиэнтэлэри түҥэттилэр, бу лиэнтэлэр блокада кэмигэр хорсун быһыыны көрдөрбүт, Кыайыыны чугаһаппыт дьоруойдарга ытыктабыл, сүгүрүйүү бэлиэтэ буолар.

Үлэ, социальнай сайдыы министиэристибэтэ.