Мииринэйгэ Wildberries үлэһитэ 1 мөл. солк. тахса суумалаах табаары иҥэриммит

2022 сыл балаҕан ыйыгар 22 саастаах Мииринэй олохтооҕо Wildberries сакааһы биэрэр пуунугар менеджеринэн үлэлии киирбит. Кини этэринэн, биир күн куйаар ситимигэр накаастабыла суох буруйу оҥорууга дьону көҕүлүүр видеону таба тутан көрбүт уонна «барыстаах схеманы» олоххо киллэрэргэ быһаарыммыт.

Мииринэй олохтооҕо Wildberries нөҥүө араас табаардары сакаастыыр эбит, ол кэннэ үлэлиир балаһыанньатын туһанан, табаары учуоттуур анал бырагыраамаҕа сымыйанан табаары төннөрүүнү регистрациялыыр эбит. Ити курдук 2023 сыл от ыйыттан ахсынньыга диэри эдэр уола 587  табаары уорбут. Хоромньу суумата  1 100 675 солк. буолбут. Табаар сороҕун бэйэтигэр иҥэриммит, атыттары социальнай ситимнэринэн араас сыанаҕа батарбыт.

Дьыаланы суут көрүүтүгэр уол буруйун толору билиммит да, накаастабылтан куотумматах. Мииринэй улууһун суута 4 сыл холоон көрөр болдьохтоох усулуобунайдык 3,5 сылга көҥүлүн быһар бириигэбэри таһаарда. Ону таһынан буруйдаахтан хоромньу сууматын толору ирдээтилэр.