Саха Далбар Хотуна «Яморжиня» куонкурус финалиһа

Саха сириттэн Далбар Хотун Туйаара Тумусова «Яморжиня» IV сезонун Бүтүн Арассыыйатааҕы куонкурус финалыгар таҕыста.

Бу туһунан ВКонтакте «Яморжиня»  страницаҕа суруйаллар.

Кини ВКонтакте страницатыгар суруйарынан, бу иннинэ,  уон сыл анараа өттүгэр, ойбоҥҥо сөтүөлээһини саҕалыам диэн санаабат да эбит. Оттон кэлин, сыыйа кыралаан, -20, -30, -45 С тымныы ууга сөтүөлээн барбыт. Ол кэннэ былырыын «Саха муорсалара» бөлөххө киирбит уонна 50+ саастаах модель буолбут.

Билигин кини аһаҕас халлаан анныгар  -35С  кыраадыска диэри тымныыга чаас устата хаартыскаҕа түһүөн сөп диэн билинэр. Куонкурус Кыһыҥҥы сөтүө Федерациятын өйөбүлүнэн ыытыллар. Бүгүн, муус устар 10 күнүгэр, кыайыылаахтары быһаарыахтара.