«Не хороните меня без Ивана» киинэни Гордон биэриитигэр дьүүллэһиэхтэрэ

Александр Гордон «Закрытый показ» бырагырааматыгар экспертэр уонна көрөөччүлэр «Не хороните меня без Ивана» диэн саха киинэтин дьүүллэһиэхтэрэ.

Дьүүллэһиигэ киинэ тэрийээччилэрэ, режиссер, киинэ сценариһа Любовь Борисова, артыыс Александр Чичагов, артыыс Нюргуяна Шадрина, киинэ генеральнай продюсера Иван Болотников, сценарист Юлия Клименко, оператор-постановщик Семен Аманатов кыттыахтара. Бырагыраама кулун тутар 30 күнүгэр киэһэ 23:00 чаастан  «Первый» ханаалга тахсыаҕа.

Экспертэр быһыытынан Госдума дьокутаата Сардаана Авксентьева, «Воздух» киинэ режиссера Алексей Герман, режиссер Евгений Григорьев, бэйиэт, публицист, суруйааччы Александр Пелевин, суруналыыс, суруйааччы, киинэ кириитигэ Роман Черкасов, ВГИК устудьуона, суруйааччы Богдан Шимохин уонна ГИТИС продюсерскай факультетын устудьуона Данил Тарян.

Санаттахха, «Не хороните меня без Ивана» диэн хартыына 2022 сыллаахха тахсыбыта. Оруолларга  Дариус Гумаускас, Александр Чичагов, Вячеслав Югов, Вера Ефремова, Кира Максимова, Михаил Кучеренко, Елена Маркова, Нюргуяна Шадрина, Степан Петров, Наталья Корякина, Иннокентий Дакаяров уо.д.а. оонньообуттара. Киинэ муусукатын Моисей Кобяков суруйбута.