Саха сиригэр ыам ыйыгар 100-тэн тахса уот турбута регистрацияланна

Саха сиригэр ыам ыйын саҕаланыаҕыттан 100-тэн тахса уот турбута регистрацияланна. Сүрүн төрүөтэ – кураанах оту уматыы.

Саха сиринээҕи ЫБММ управлениета иһитиннэрэринэн, баһаарынай куттал суох буолуутун ирдэбиллэрин кэһии иһин улахан ыстарааптар күүтэллэр.

Кураанах окко кулуһунтан, быраҕыллыбыт табахтан эбэтэр испиискэттэн уот туруон сөп. Оттон тыаллаах күн уот олорор дьиэлэргэ уонна даачаларга көһөр кутталланар.

«Ыарҕаны, оту-маһы уонна атын үүнээйини уопсастыбаннай сирдэртэн ураты уоттааччыларга сокуон хараҕынан административнай эппиэккэ тардыллаллар. Гражданнары уоттан куттала суох буолууга эппиэтинэстээхтик сыһыаннаһарга, дьиэҕитин-уоккутун, учаастаккытын  харыстыырга эрдэтинэ кыһалларгытыгар ыҥырабын. Уоттан сэрэхтээх буолууга уулаах уонна кумахтаах буочукаларынан хааччыныҥ», — диэн Саха сиринээҕи ЫБММ кылаабынай управлениетын баһаарынайдарын учуоттуур тэрийэр-аналитическай хааччыйыы отделын начаалынньыга Яна Лапеко ыҥырыы таһаарда.

Баһаартан сэрэхтээх буолуу ирдэбиллэрин кэһии иһин административнай ыстарааптар көрүллэллэр:

• гражданнарга — 5000-тан 15 000 солк. диэри;
• дуоһунастаах сирэйдэргэ — 20 000- тэн 30 000 солк. диэри;
• урбаанньыттарга -40 000-тан 60 000 солк. диэри;
• юридическай сирэйдэргэ — 300 000-тэн 400 000 солк. диэри.

Оттон ыксаллаах быһыы-майгы эрэсиимин кэмигэр ыстарааптар кээмэйэ икки төгүл улаатар.