Саха сириттэн байыастарга тиэхиньикэ уонна гуманитарнай көмө саҥа баартыйата ыытылынна

Өрөспүүбүлүкэтээҕи суһал ыстаап анал байыаннай дьайыыга сылдьар Саха сирин байыаннайдарын эбии тэрилинэн хааччыйар үлэтин былаан быһыытынан салгыыр. Бу туһунан брифинг кэмигэр Гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин солбуйааччы Яна Наумова иһитиннэрдэ.

«Бу нэдиэлэҕэ байыаннайдарга волонтердар тэрийбит гуманитарнай көмөлөрө, ону таһынан дьонуттан-сэргэтиттэн аадырыстаах баһыылкалар ыытылыннылар. Ону тэҥэ үс массыына уонна икки матасыыкыл барда. Суол устун — Аллараа Бэстээххэ уонна Нерюнгрига эбии үс тиэхиньикэни, гуманитарнай көмөнү уонна баһыылкалары тиэйиэхтэрэ», — диэн Яна Наумова кэпсээтэ.

Миниистири солбуйааччы бэлиэтииринэн, тэрилтэлэртэн уонна олохтоохтортон гуманитарнай көмөнү, тиэхиньикэни хомуйуу уонна ыытыы тиһигин быспакка барар.

Быйылгы сыл саҕаланыаҕыттан фронт диэки уопсайа 55 рейс оҥоһуллубут. Ол иһигэр:

• 163 тимир көлө ыытыллыбыт.
• 240 туоннаттан тахса гуманитарнай көмө уонна тус баһыылкалар тиэрдиллибиттэр.

Брифиҥҥэ байыастары өйүүр IV Өрөспүүбүлүкэтээҕи фашизмы утары пуорумҥа бэлэмнэнии туһунан эмиэ этилиннэ. Пуорум Дьокуускай куоракка сэтинньи 2–7 күннэригэр ыытыллыаҕа.

Тэрээһин бырагырааматыгар Илин уонна Соҕуруу байыаннай уокуруктарын үлэлиир бөлөхтөрүн кытта пресс-кэмпириэнсийэ, Аҕа дойдуну көмүскээччилэр дьиэ кэргэттэрин кэмитиэтин уонна байыаннай дьайыы бэтэрээннэрин Ассоциациятын кытта көрсүһүүлэр, быыстапкалар, төгүрүк остуоллар уонна патриотическай кэнсиэртэр бааллар. Ону таһынан Горнай улууһугар тахсан үлэлиэхтэрэ.

Саха Өрөспүүбүлүкэтин Ил Дарханын уонна  Бырабыыталыстыбатын пресс-сулууспата.

Сиһилии: https://www.sakha.gov.ru/news/68184