Саллаат аҕата уолунан киэн туттар

Бу күннэргэ Бүлүү улууһун I Күүлэт нэһилиэгэр олорор Васильевтар дьиэ кэргэттэрэ үөрүүлээх сонуну туттулар. Быйыл саас ыал аҕа баһылыга Геннадий Егорович уонна байыаннай дьайыыларга сылдьар кинилэр уолларын туһунан суруйбутум.

Оттон бэҕэһээ Васильевтар уоллара байыаннай дьайыыларга сылдьан ураты хорсун быһыыны көрдөрбүтүн иһин «Хорсунун иһин» мэтээлинэн наҕараадаланна. Ол туһунан үөрүүтүн Геннадий Васильев маннык үллэстэр: «Бу наҕараадаҕа иккис эчэйиитинэн госпитальга сыттаҕына түһэрбиттэр эбит. Улахан киирсиилэр кэннилэриттэн хаан тохтуулаах кыргыһыы хонуутуттан бааһырбыт доҕотторун хомуйан сылдьан, дронунан быраҕыллыбыт гранаталарга түбэһэн бааһырбыта. Бастаан Ростов, онтон Екатеринбург госпиталларыгар сытан эмтэнэн баран, аҕыйах күҥҥэ дойдутугар уоппускаҕа кэлэн барбыта. Наҕараадаҕа түспүтүн туһунан бэҕэһээ мэтээлин тутуоҕар диэри билбэккэ сылдьыбыт этэ. Дьиҥэ, олунньу бүтүүтэ Арассыыйа Бэрэсидьиэнэ илии баттаабыт эбит, онто саҥа кэлбит. Бэҕэһээ тута биһиэхэ биллэрбитэ».

Саллаат аҕата уолунан киэн туттуон туттар. Геннадий Егорович оҕолорун үлэнэн, үтүө холобурунан, эр санаалаах, хорсун-хоодуот буоларга ииппитин саллаат уолун холобуругар көрөбүт.