Сүүйүүлээх оонньуулары тэрийбит тэрээһиннээх бөлөх тутулунна

Арассыыйа Силиэстийэлиир кэмитиэтин Саха сиринээҕи салаатын ураты суолталаах дьыалаларын силиэстийэлиир отделын ыстаарсай силиэдэбэтэлэ РФ Холуобунай Кодексатын 171.2 ыст. 3 ч.  (тэриллиилээх бөлөҕүнэн  сүүйүүлээх оонньуулары сокуоннайа суох тэрийии уонна ыытыы) буруйу оҥоруу чахчыта баарынан холуобунай дьыала тэрийдэ.

Бу туһунан СӨ Силиэстийэлиир кэмитиэтэ иһитиннэрэр. Силиэстийэ көрдөрөрүнэн, 2023 сыл олунньу ыйыттан 2024 сыл алтынньы ыйыгар диэри Дьокуускай куорат хас даҕаны олохтооҕо, тэриллиилээх бөлөх быһыытынан, Саха сиригэр сокуону кэһэн туран сүүйүүлээх оонньуулары тэрийбиттэр.

2024 с. алтынньы 9 күнүгэр суһал-көрдүүр үлэ түмүгэр тэриллиилээх бөлөх үлэтэ ИДьМ, ФСБ, УФСИН Саха сиринээҕи салалталарын уонна Росгвардия үлэһиттэринэн тохтотулунна.

Силиэстийэлиир уорган дьэҥниир кэмигэр 500 тыһ. солк. тахса харчыны, күндү металтан оҥоһуктары ылла уонна дакаастыыр  матырыйаалы булла.

Силиэстийэ көрдөһүүтүнэн тэрээһиннээх бөлөх үс салайааччытын тутан хаайдылар, оттон өссө үс киһини дьиэтээҕи хаайыыга олортулар. Билигин буруйу оҥорууга кыттыгастаах дьону буларга уонна тутарга туһуламмыт силиэстийэлиир дьаһаллар уонна суһал көрдөөһүн үлэлэрэ бара тураллар.