Табаһыттарга көмөлөспүт оҕолор хамнас аахсыахтара

Оҕолор сайыҥҥы сынньалаҥнарын тэрийии боппуруоһа олус судургута суох, дьиҥэ. Сыл аайы оҕолор сынньалаҥнарыгар кыһанар тыа хаһаайыстыбаларын тэрилтэлэрэ бааллара  үчүгэй.

Холобур, Кэбээйигэ “П.А.Кейметинов аатынан Сэбээн Күөл” МУП дириэктэрэ Людмила Бурцева оҕолору таба иитиитигэр сыһыараары уонна дьарыктаах буоллуннар диэн, улуустааҕы Нэһилиэнньэ дьарыктаах буолууга киинин кытта ыкса үлэлэһэр. Ол түмүгэр быйыл эмиэ Сэбээн Күөл оҕолоро ыстаадаларга тахсан, табаһыттарга көмөлөстүлэр, көй салгынынан тыыннылар, үлэни уонна сынньалаҥы дьүөрэлээтилэр.

— Нэһилиэнньэ дьарыктаах буолууга киинин кытта үлэлэһэн, биһиэхэ бу киин нөҥүө 21 оҕо үлэлээтэ. Өссө алта оҕону бэйэм үлэлэттим. Оҕолор үс ыстааданан  үлэлээтилэр. Улахан кылаас уолаттара ыстаадаҕа быһыт тутуутугар көмөлөстүлэр. Онон туһалара үгүс. Бу үлэлээбит оҕолорбор барыларыгар хамнас төлөөрү олоробун, — диэтэ дириэктэр Людмила Бурцева.