«Тоҕус томтор оонньуулара» кыайыылааҕынан Павел Друзьянов буолла

Бэс ыйын 15 күнүгэр Чурапчыга Боотур Уус стадиоҥҥа тохсус төгүлүн ыытыллар «Тоҕус томтор оонньуулара» кыайыылаахтара билиннилэр. Күрэх быйыл күүһү-уоҕу, тулууру, сымса буолууну эрэйэр күрэх «Өбүгэлэр оонньуулара» муҥуутуур кыайыылааҕа, Ханты-Мансийскайга ыытыллыбыт «Мистер Норд» күрэх анал аат хаһаайына, мас тардыһыытыгар өрөспүүбүлүкэ хас да төгүллээх чөмпүйүөнэ Степан Алексеев аатыгар ыытылынна.

Икки күн устата уон кыттааччы бэрэмэдэйдээх сүүрүү, мас тардыһыыта, тутум эргиир, 400 м сүүрүү, «Үс төгүл үс» ыстаныыга, хапсаҕайга, «Кулун тардыыга», бэрэбинэ көтөҕүүгэ, ох саанан ытыыга курдук упсуорт көрүҥнэригэр илин-кэлин түһүстүлэр.

Кылаабынай судьуйанан Арассыыйа Федерациятын бастакы категориялаах успуорт судьуйата Семен Колодезников үлэлээтэ.

Күүстээхтэр күрэстэригэр Семен Аммосов (Чурапчы), Павел Друзьянов (Чурапчы), Алексей Ефимов (Муома), Давид Колесов (Мэҥэ Хаҥалас), Ньургун Лавров (Чурапчы), Архан Максимов (Таатта), Дмитрий Петров (Бүлүү), Мирхатим Рахматулин (Амма), Антон Тойтонов (Нам), Владимир Федоров (Ньурба) курдук дэгиттэр спортсменнар кытыннылар.

Тыҥааһыннаах киирсии түмүгүнэн кыайыылааҕынан биир Чурапчыттан Павел Друзьянов буолла уонна 500 тыһ.солк. уу харчынан наҕараадаланна. Иккис миэстэ буолары Ньурба улууһун бухатыыра Владимир Федоров ситистэ. 300 тыһ. солк. сууманан наҕараадаланна. Үһүс миэстэ Мэҥэ Хаҥаластан Давыд Колесов буолла уонна 150 тыһ. солк. тутта. Оттон атын спортсменнар сыаналаах бириистэринэн наҕараадаланнылар.