Торуойдар саҥа кинигэлэрин ааптардара — ытык дьон

Бу күннэргэ Нам улууһун II Хомустаах нэһилиэгин олохтоохторо XVII үйэттэн саҕалаан XXI үйэҕэ диэри сайдан кэлбит нэһилиэктэрин устуоруйатын, дьонун-сэргэтин үйэтиппит «Нам улууһун II Хомустаах нэһилиэгэ» диэн кинигэни тутан, бэрт үгүс билбэтэхтэрин биллилэр, төрөөбүт дойдуларынан киэн тутуннулар.

Кинигэни бэлэмнээн хомуйбут дьон үс сыл устата үгүс үлэни оҥордулар. Матырыйаалы хомуйууга Мария Габышева, Мария Гоголева, Мария Сивцева, Ульяна Сивцева үлэлээтилэр. Кинигэ тылын-өһүн суруналыыстар Екатерина Габышева, Георгий Белоусов, Касьян Олесов тупсардылар, эрэдээксийэлээтилэр. Таһаарыы эрэдээктэрэ — Эдуард Пономарев.

Бу 451 сирэйдээх кинигэҕэ ыалларынан наарданан, дьиэ кэргэнинэн түмүллэн, нэһилиэктэн үүммүт салайааччылар, нэһилиэги дорҕоонноохтук ааттаппыт биир дойдулаахтара,  үлэлээн ааспыт дьон үтүө ааттара үйэтитилиннэ. Нэһилиэк хас биирдии олохтооҕо кинигэҕэ киирбитэ — сэдэх көстүү.

Бүгүн биһиги кинигэ ааптардарыттан биирдэстэрэ, РФ Уопсай үөрэхтээһинин Бочуоттаах үлэһитэ, СӨ үөрэҕириттин туйгуна, СӨ үөрэҕин бочуоттаах бэтэрээнэ, Нам улууһун Ытык киһитэ, методист-учуутал, нэһилиэк Бочуоттаах олохтооҕо Мария Гоголевалыын кэпсэтэбит.

Мария Алексеевна «Саха сирэ» хаһыаты олус сөбүлээн ааҕар эбит. Онон сэһэргэһиибит бу хаһыаттан саҕаланна.

Мария Гоголева кэлиҥҥи 17 сыл устата уһуйаан иитээччитинэн үлэлиир. Кини оҕолору ийэ дойдуга бэриниилээх буолууга — патриотизмҥа уһуйар.

Мария Алексеевна оҕону иитиигэ аналлаах бэйэтэ ааптарскай бырагыраамалары, бырайыактары суруйар эбит.

Кинигэ ааптардара биир дойдулаахтарыгар Дьиэ кэргэн сылыгар бэртээхэй бэлэҕи ууннулар. Анал хамыыһыйа тэрийэн, ким тугу гынарынан арахсыбыттар. Бу туһунан Мария Алексеевна маннык билиһиннэрэр:

Архыыпка үлэ Мария Алексеевнаҕа түбэспит. Онон хаһаайыстыбаннай кинигэнэн сирдэтэн бэрт улахан үлэ ыытыллыбыт.

Кинигэҕэ бэрт элбэх хаартыска киирбит.   Хаартыскалары  көрдөөһүн — эмиэ бириэмэни эрэйэр үлэ.

Кинигэ 5 түһүмэхтэн турар. Бастакы чааһа устуоруйа чахчыларыгар анаммыт.

Төрдүс түһүмэх — нэһилиэк үс учаастагар олорбут-үлэлээбит дьон ыалынан алпаабытынан кинигэҕэ сурулуннулар.

Мария Алексеевна: «Биир дойдулаахтарым дойдубут устуоруйатын, дьонун-сэргэтин билиэхтэрин көрүөхтэрин баҕардахтарына, бу кинигэ хайаан да көмөлөһүөҕэ», – диэн баҕа санаатынан кэпсэтиибитин түмүктээтибит.