Тускул оҕуруотчуттары сэрэтэр: «Бу түүн улахан хаһыҥ түһүөҕэ»

Алаас, ойуур ача күөҕүнэн сууланан, самаан сайын салыллыллан, Ийэ айылҕабыт тупсан аҕай турар кэмэ.

Ол эрээри, халааммыт ыам ыйын бүтүүтэ куйааран баран, эмискэ сөрүүкээн соһутан эрэр. Норуот синоптига Тарас Тарасов- Тускул “бу түүн сэрэниҥ” диэн дьонун-сэргэтин сэрэтэр иһитиннэриитэ социальнай ситимнэринэн тарҕанан эрэр.

— Дьэ, доҕоттор, аны хотуттан саҕалаан, соҕуруу улуустарга тиийэ  халлааммыт  эмискэ сөрүүкээн соһутта. Урукку өттүгэр хотуттан тыалырдаҕына, тымныыны аҕалар этэ. Билигин аны хотугулуу илин эҥэр көһөн, урукку сылларга “бу диэкиттэн тымныы кэлбэт» дии олордохпутуна, эмискэ Магадаантан тымныы салгыны аҕалан, Тымныы полюһуттан Өймөкөөнтөн саҕалаан, илин эҥэр улуустарга хаһыҥнаан соһутта. Ол курдук, Уус Маайа, Томпо, Амма, Уус Алдан, Таатта, Чурапчы улуустарын хапта.

Оттон бу түүн, бэс ыйын 4 күнүгэр, Илин эҥэр, киин улуустарга, Алдан, Нерюнгри улуустарын хабан, улахан хаһыҥ түһүөҕэ. Онон үүнээйилэргитин бу киэһэ сабыҥ, бүрүйүҥ диэн сүбэлиибин. Маннык хаһыҥ хас да күн салҕанан барыаҕа, онон эрдэттэн сэрэммит ордук.

Маныаха биири өйдүүр ордук: +4С кыраадыс — биологическай температура. Бу мантан намтаата да, +3, +2, +1 С буолла да, тыынар тыыннаах килиэккэлэрэ тоҥон өлөн бараллар. Онон +5, +6С кыраадыс буолла да, сэрэниэххэ наада.