Владимир Путин 2024 сылы Дьиэ кэргэн сылынан биллэрдэ
Бэҕэһээ, сэтинньи 22 күнүгэр, РФ Бэрэсидьиэнэ Владимир Путин кэлэр 2024 сылы дойдуга Дьиэ кэргэн сылынан биллэрдэ.
Бу быһаарыы дьиэ кэргэн сыаннастарын уонна дьиэ кэргэни көмүскүүр судаарыстыбаннай бэлиитикэни күүһүрдэр, тарҕатар туһуттан ылылынна. Бэрэсидьиэн бырабыыталыстыбаҕа ахсынньы 27 күнүгэр диэри тустаах кэмитиэти тэрийэргэ уонна Дьиэ кэргэн сылын былаанын бигэргэтэргэ сорудахтаата.
Бу тэрийэр кэмитиэт бэрэссэдээтэлинэн вице-премьер Татьяна Голикова ананна. Оттон эрэгийиэннэр салалталара эмиэ кыттыһан, туспа былаан оҥостуохтаахтар. 2007 сылтан Владимир Путин үүнэр сылы ханнык эрэ тиэмэҕэ аныыр. 2008 сыллаахха Арассыыйаҕа аан бастаан Дьиэ кэргэн сыла бэлиэтэммитэ. Онон Дьиэ кэргэн сыла иккиһин бэлиэтэниэҕэ.
Оттон Саха сиригэр 2022 сыл Ил Дархан Айсен Николаев ыйааҕынан Ийэ сылынан биллэриллибитэ. Дьиэ кэргэн уонна Ийэ — быстыспат өйдөбүллэр. Дьиэ кэргэн уонна Ийэ — хас биирдии киһиэхэ олоҕор саамай күндү өйдөбүллэр. Судаарыстыба бу эйгэлэри сайыннаран, үп-харчы көрөн, араас тэрээһиннэри ыытан, бөҕөргөтөр суолу тутуһар.
Сообщить об опечатке
Текст, который будет отправлен нашим редакторам: