Үөһээ Бүлүүгэ бүгүн амфибия-сөмөлүөттэр үлэлииллэр
![](https://sakha-sire.ru/wp-content/uploads/2024/07/6ec5a731-6a3c-4067-a95d-0332d58eb769-900x596.jpg)
От ыйын 25 күнүгэр Үөһээ Бүлүү улууһугар Арассыыйа ыксаллаах быһыыга-майгыга министиэристибэтин икки «Бе-200» сөмөлүөттэрэ үлэлииллэр. Биир сөмөлүөт Андреевскай сэлиэнньэ аттыгар, иккис — Тиэрбэс сэлиэнньэтин аттыгар уоту кытта охсуһаллар.
![](https://sakha-sire.ru/wp-content/uploads/2024/07/56f33ddc2d33a47a627366edb94ef23d792c8b60.jpeg)
Бүгүҥҥү күҥҥэ Үөһээ Бүлүү улууһугар 7 ойуур баһаара баар, олортон 4-дэ нэһилиэнньэлээх пууннар аттыларыгар умайаллар. Баһаардары умуруорарга 350 киһи үлэлиир, ол иһигэр — Тюменьтан кэлбит 50 парашютист уонна десантник.
«Якутлесресурс» салайааччыта Виктор Омуков иһитиннэбитинэн, уот Быракаан уонна Өргүөт сэлиэнньэлэригэр киирэр куттала ааста. Утары уоту ыыттылар, минеральнай балаһаны оҥордулар. Маннык үлэ Андреевскай сэлиэнньэтин аттыгар эмиэ оҥоһуллуоҕа.
Саха сиригэр билигин 93 ойуур баһаара уонна 1 ландшафтнай баһаар умайар. 1800 киһи уонна 100 тиэхиникэ үлэлиир. «Бе-200» сөмөлүөттэри таһынан, ууну кутар бөртөлүөттэр үлэлииллэр.
Баһаардары утары Үөһээ Бүлүүгэ, Абыйга, Дьааҥыга, Бүлүүгэ, Горнайга, Кэбээйигэ, Ленскэйгэ, Мииринэйгэ, Ньурбаҕа, Өлүөхүмэҕэ, Сунтаарга, Уус Маайаҕа охсуһаллар.
Ил Дархан, бырабыыталыстыба пресс-сулууспата.
Сообщить об опечатке
Текст, который будет отправлен нашим редакторам: