Үөһээ Бүлүүгэ өрүс кытылын бөҕөргөтүү үлэтэ түмүктэнэн эрэр

Үөһээ Бүлүү сэлиэнньэтигэр Бүлүү өрүс кытылын бөҕөргөтүү үлэтэ түмүктэнэн эрэр. Билигин бэдэрээттэһэр тэрилтэ сааскы көмүөл, халаан кэнниттэн, чөлүгэр түһэрэр үлэни ыытар. Балаҕан ыйыгар эбийиэк үлэтэ бүтэн, туттарыахтара.

Кэнники сылларга өрүс кытыла сэлиэнньэ диэки 60-ча миэтэрэ өтөн киирбитэ. Онон чааһынай дьиэлэр, социальнай эбийиэктэр сууллар, алдьанар кутталламмыттара. Үлэ түмүктэннэҕинэ, бу кыһалҕа сүтүөҕэ.

Көмүөл, халаан кэнниттэн, анал хамыыһыйа ыытыллыбыт үлэ туругун бэрэбиэркэлээбитэ. Сорох сиринэн сыыһалар бааллара көстүбүтэ. Онон бэдэрээтчит билигин бу сыыһалары туоратарга үлэлиир.

Үөһээ Бүлүү сэлиэнньэтин аттынан өрүс биэрэгин бөҕөргөтүү уһуна 2856 миэтэрэ, үрдүгэ — 12,8 миэтэрэ. Бу учаастакка барыта 118 тыһыынча куб кумаҕы, 26 тыһыынчаттан тахса куб кумах-гравий холбоһугун, 28 тыһыынчаттан тахса бытархай тааһы, 66,2 тыһыынча  кв.м. иэннээх «геоспан» матырыйаалы аҕалбыттар.

Бу үлэ «Воспроизводство и использование природных ресурсов» диэн судаарыстыбаннай бырагырааматтан үбүлэммит.

Ил Дархан, бырабыыталыстыба пресс-сулууспата.