Үөһээ Бүлүүгэ сири нүөлсүтүү үлэтэ ыытыллар

Бэҕэһээ Үөһээ Бүлүү улууһугар СӨ тыа хаһаайыстыбатын миниистирин солбуйааччы Сахаяна Афанасьева, «Упрмелиоводхоз» тэрилтэ салайааччыта Дмитрий Махаров, «Россельхозцентр» салайааччыта Агнесса Данилова сири нүөлсүтэр систиэмэлэри көрдүлэр.

Лиманнай систиэмэлэри оҥорууга, сири нүөлсүтүү үлэлэрин ыытарга өрөспүүбүлүкэттэн үбүлээһин көрүллэр. Ууну түһэрэн оҥоһуллубут хонуу сирдэр от үүнүүтүн төһө биэрэллэрин анаализтаан көрдүлэр. Анализ түмүгүнэн эбии туох үлэ барыан сөбүн быһаарыахтара.

Билигин Үөһээ Бүлүү улууһугар от үлэтин үгэнэ, ол эрээри сорох сирдэргэ ойуур баһаардара күүскэ тураннар, окко киирэ иликтэр.

Үөһээ Бүлүү улууһун тыатын хаһаайыстыбатын салайааччыта Кирилл Гаврильев иһитиннэрбитинэн, быйыл курааннаан хордоҕой сирдэр үүнүүлэрэ мөлтөх. Быйылгы сыл улуус оттуур былаана 26000 т диэн Үөһээ Бүлүү улууһун дьаһалтатын пресс-сулууспата иһитиннэрэр.

От ыйын 22 күнүнээҕи туругунан, улуус үрдүнэн 1647 т от бэлэмнэннэ, уопсайа 537 тыраахтыр, 32 механизированнай звено, 213 полумеханизированнай звено, уопсайа 997 киһи оттуу сылдьаллар.