Үйэлэргэ өлбөөдүйбэт үтүө холобур
![](https://sakha-sire.ru/wp-content/uploads/2024/05/sivczeva-ekaterina-dmitrievna-850x596.jpeg)
Киһи сааһын тухары ийэтин күндүтүк саныыр, сүрэҕэр чугастык тутар. Төһө да сааһырдаргын, ийэҥ аттыгар баар буолуон, аҕыйах да мүнүүтэҕэ, сөкүүндэҕэ оҕо сааскын эргитэн ылыаххын, кинини кууһуоххун, куустарыаххын, сыллыаххын, сыллатыаххын олустук баҕараҕын. Күндү киһиҥ эппит тыла күндүтүйэн, сүбэлээбит сүбэтэ сүрэххэр-быаргар уратытык иҥэн иһэргэ дылы буолар эбит.
Биһиги ийэбит тыыл, үлэ бэтэрээнэ, үчүгэй үлэтин иһин элбэх ахсааннаах наҕараадалардаах, сэттэ оҕолоох дьоруой ийэ, Бээди олохтооҕо Сивцева Екатерина Дмитриевна 86 сааһыгар бу орто дойдуттан букатыннаахтык арахсан барда. Сэттэ оҕото бары атахпытыгар турарбытыгар, ыал буоларбытыгар улахан кыһамньытын уурбут ытык, күндү киһибит, ийэбит барахсан. Оҕолоро бары куоратынан, тыанан олоробут. Ийэбит туох диирий диэн бэйэбит икки ардыбытыгар сибээһи тутан, сааһырбыт дьон ийэбит тылыттан тахсыбакка, барахсаммыт туох санаалааҕын барытын билэргэ-көрөргө кыһаллан, кини биһигини бүөбэйдээн улаатыннарбытыгар махтанан, хоолдьуктаах бэйэбит хоҥкуйан, сүһүөхтээх бэйэбит сүгүрүйэн, Ийэ диэн тылы ис сүрэхпититтэн долгуйан туран истиҥник ааттаан, ийэбит барахсан тула үмүөрүһэн, түмсэн кэллибит.
Ийэбит Дмитрий диэн Бороҕоҥҥо олорор уолугар олорбута. Кэлин Бороҕоҥҥо олорор Марина, Антонина, Дмитрий, сүрүннээн үһүөн ийэбитин кыра оҕо курдук бүөбэйдээн, кырдьаҕас киһини санаатын хоту сылаастык, сымнаҕастык көрөн, ыраастык тутан, ийэбит барахсан баҕарар аһын астаан аһатан, туох баар кыһамньыларын уурдулар, уйаҕастык сыһыаннастылар. Наада буоллаҕына балыыһаҕа киллэрэн эмтэтэн, санаатын бөҕөргөтөн, быраастары кытары сибээһи ыкса тутан, туох баар болҕомтолорун ууран сырыттылар. Ийэҕэ, үтүө, амарах киһиэхэ махтал, истиҥ сыһыан диэн итинник буоллаҕа.
Биһиги аймах Дмитрийгэ, кини дьиэ кэргэнигэр барыларыгар уонна балтыбытыгар Маринаҕа, уо.д.а. махталбытын биллэрэбит. Эһиги үтүө санааҕыт үйэлэргэ өлбөөдүйүө суоҕа.
Иван Сивцев — Бээди.
Сообщить об опечатке
Текст, который будет отправлен нашим редакторам: