Үс киһи “уһун илиилээх” дистанционнай түөкүттэргэ киирэн биэрбит

СӨ ИДьМ пресс-сулууспата иһитиннэрэринэн, ааспыт сууккаҕа өрөспүүбүлүкэ полицияҕа салааларыгар дистанционнай түөкүттэргэ киирэн биэрбит үс киһи тиийэ сылдьыбыт.

Ол курдук, 66 саастаах авиахампаанньа муоста сууйааччытыттан сымыйа “киин баан” үлэһиттэрэ 274 тыһ. солк. уорбуттар.

Онтон иккис түгэҥҥэ 31 саастаах Дьокуускай куорат үлэтэ суох олохтооҕо киирэн биэрбит. Кини ахсынньы 21 күнүттэн тохсунньу 5 күнүгэри диэри түөкүттэргэ 2,8 мөл. солк. “инвестициялаабыт”.

Кэбээйи улууһун 52 саастаах олохтооҕо түөкүттэр эмиэ сымыйа “инвестицияларыгар” 560 тыһ. солк. былдьаппыт.

Төлөпүөнүнэн эрийдэхтэрин, минньигэс тыллары эттэхтэрин, буолар-буолбат сигэни ыыттахтарын аайы итэҕэйэн, киирэн иһэр табыллыбат. Аныгы кэмҥэ харахха көстүбэт угаайылаах түөкүттэр элбэхтэрин умнумаҥ.