Дьокуускайга оҕо иитэ ылбыт дьиэ кэргэттэр сүлүөккэ түмсүөхтэрэ

Бэс ыйын 26 күнүгэр Дьокуускайга  оҕо иитэ ылбыт дьиэ кэргэттэр VIII өрөспүүбүлүкэтээҕи сүлүөтэ ыытыллыаҕа.

Бу күн сүлүөккэ Дьокуускай, Алдан, Булуҥ, Үөһээ Бүлүү, Эдьигээн, Нам, Ньурба, Өлүөхүмэ, Хаҥалас, Чурапчы уонна да атын оройуоннар тулаайах уонна көрүүтэ-истиитэ суох хаалбыт оҕолор төрөппүттэрэ, салайааччылара уонна тэрилтэлэр исписэлиистэрэ  кыттыыны ылыахтара.

Ону таһынан тэрээһиҥҥэ СӨ Үлэҕэ уонна социальнай сайдыыга министэристибэтин, РФ Үөрэҕин уонна наукаҕа министиэристибэтин, РФ Соцпуонда, суут приставтарын федеральнай сулууспатын управлениетын бэрэстэбиитэллэрэ, ону тэҥэ оҕону иитиигэ үчүгэй уопуттаах төрөппүттэр кыттыахтара.

Санаттахха, кэнники биэс сылга Саха сиригэр оҕону иитэ ылбыт дьиэ кэргэн уонна оҕо ахсаана элбиир. Билигин 235 оҕону иитэ ылбыт дьиэ кэргэҥҥэ 656 тулаайах уонна көрүүтэ-истиитэ суох хаалбыт оҕолор иитиллэллэр.