Айсен Николаев: «Өрөспүүбүлүкэ күнүнэн эҕэрдэлиибин!»
КҮНДҮ САХА СИРИН ОЛОХТООХТОРО!
Саха Өрөспүүбүлүкэтин салалтатын уонна тус бэйэм ааппыттан Өрөспүүбүлүкэ күнүнэн эҕэрдэлиибин!
Муус устар 27 күнэ – биһиги хотугу сирбит элбэх омуктаах норуотун түмэр бэлиэ күн. Бу – өрөспүүбүлүкэни төрүттээбит уонна кинилэр дьыалаларын салҕаабыт, Улуу Арассыыйа састаабыгар төрөөбүт өрөспүүбүлүкэбит cаргылаах сарсыҥҥыта салалларыгар олохторун анаабыт дьоммутугар ытыктабылы кэрэһилиир күн. Саха Автономиятын төрүттээччилэр – Максим Кирович Аммосов, Платон Алексеевич Ойуунускай, Исидор Никифорович Барахов уонна кинилэр дьыалаларын салҕааччылар Сахабыт сирэ чэлгийэ сайдар суолун тэлбиттэрэ. Өрөспүүбүлүкэ Бастакы Бэрисидьиэнэ Михаил Ефимович Николаев уонна кини соратниктара Саха сирин аныгы устуоруйатын түстээбиттэрэ.
Бүгүн үйэлээх үгэстэри утумнаан, Саха сирин олохтоохторо сыралаах үлэлэринэн олорон ааспыт көлүөнэлэр ситиһиилэрин, кыайыыларын үксэтэллэр, чиҥэтэллэр. Дойду модун кыаҕын бөҕөргөтүүгэ өрөспүүбүлүкэ дьоһун кылаатын салгыы киллэрэр.
Арассыыйа Федерациятын Бэрэсидьиэнин быыбарын түмүгүнэн Владимир Владимирович Путин урукку өттүгэр бэлиэтэммэтэх муҥутуур көрдөрүүнү – быыбардааччылар куоластарын 87,79 % ылан, бигэ кыайыыны ситистэ. Элбэх омуктаах Сахабыт сирэдойду баһылыгын, улуу державаны кытта тэҥҥэ кэлэр кэскилин тутар.
Экэниэмикэҕэ эмиэ үтүө көрдөрүүлэрдээхпит. Тэҥнэниллибит сыананан кэнники алта сыл эрэгийиэннээҕи баалабай бородуукта23 % кэриҥэ үрдээтэ, ол Арассыыйа орто көрдөрүүтүн куоһарар. Бусылларга эрэгийиэн экэниэмикэтигэр 2,8 трлн солкуобай суумалаах инвестиция киирдэ.
Итини сэргэ социальнай эбийиэктэри тутууга үрдүк көрдөрүүлэрбитинэн киэн туттабыт. Ол курдук кэнники аҥардас алта сылга национальнай бырайыактар уонна судаарыстыбаннай бырагыраамалар чэрчилэринэн 329 бөдөҥ социальнай эбийиэк тутулунна. Федеральнай бүддьүөттэн национальнай бырайыактары үбүлээһин көрдөрүүтүнэн дойду бары эрэгийиэннэрин ортотугар Саха сирэ үһүс миэстэлээх. Арассыыйа Федерациятын Бэрэсидьиэнэ Владимир Владимирович Путин көҕүлээбит национальнай бырайыактара дойду сайдыытын тутаах инструменынан буолаллар.
Саха сирин нэһилиэнньэтэ элбии турар, оҕо төрөөһүнүн ахсаанынан федеральнай уокурукка бастакы миэстэлээхпит, дойду уон бастыҥ эрэгийиэнин иһигэр киирэбит. Уһук Илиҥҥи федеральнай уокурукка элбэх оҕолоох ыал саамай элбэх ахсаана биһиэхэ баар. Саха сирин нэһилиэнньэтин орто сааһа Арассыыйа нэһилиэнньэтин орто сааһыттан 5 сылынан эдэр. Оттон ааспыт сыл олоҕу олоруу уһуна аан бастаан дойду орто көрдөрүүтүн куоһарбыт уонна 73,67 сылга тэҥнэспитэ. Бу барыта биһиги дьоммут-сэргэбит оҕолорун уонна сиэннэрин кэскиллэрин өрөспүүбүлүкэни кытта ситимнииллэрин туоһулуур.
Бүгүн Арассыыйа норуотун кытта бииргэ судаарыстыбабыт тутулуга суох буолуутун, төрүт үгэстэрбитин уонна сыаннастарбытын туруулаһабыт. Биһиги уолаттарбыт өстөөҕү утары хорсуннук кыргыһа сылдьаллар. Саха сирин бары олохтоохторо кинилэргэ, кинилэр дьиэ кэргэннэригэр, босхоломмут нэһилиэнньэлээх пууннар олохтоохторугар төһө кыайалларынан көмөнү оҥороллор. Биһиги Кыайыыга уонна дойдубут саргылаах сарсыҥҥы күнүгэр бигэ эрэллээхпит!
Ханнык да ыарахаттары аахсыбакка, инники диэки дьулуһабыт. Аны сайын “Азия оҕолоро” норуоттар икки ардыларынааҕы VIII спортивнай оонньуулар Арассыыйаҕа 2024 сылга ыытыллар спорт биир бөдөҥ тэрээһининэн, араас дойду оҕолорун доҕордоһууларын өрөгөйүн туоһутунан буолуохтара.
Сомоҕолоһуубут, Ийэ дойдуга тапталбыт, дойду модун кыаҕар эрэлбит, күүрээннээх үлэбит аныгы кэм тургутууларын чиэстээхтик туоруурга, өрөспүүбүлүкэбитин уонна дойдубутун чэлгийэ сайыннарарга туруоруммут сыалбытын ситиһэргэ төһүү буолуохтара.
Күндү Саха сирин олохтоохторо! Эһиэхэ чэгиэн доруобуйаны, уҕараабат эрчими, эйэлээх халлааны, бары үтүөнү, саҕалаабыт дьыалаҕытыгар ситиһиилэри, дьолу-соргуну уонна уйгулаах олоҕу баҕарабын!
Айсен НИКОЛАЕВ, Саха Өрөспүүбүлүкэтин Ил Дархана.
Сообщить об опечатке
Текст, который будет отправлен нашим редакторам: