Икки киһи өлүүлээх суол быһылаана таҕыста

Суолга халтараан буолан, бу күннэргэ массыына саахала тахсыыта элбээтэ.

Ол курдук, алтынньы 29 күнүгэр сарсыарда 11 чаас саҕана Таатта улууһугар «Халыма» федеральнай суол  213 км  «Лада-212140» массыына суоппара уруулун кыайан туппакка,  суолтан түҥнэстибит. Ол түмүгэр, суһал көмө кэлиэр диэри   1949 сыллаах төрүөх суоппар уонна  1958 сыллаах пассажир дьахтар өлбүттэр. Бу дьон Таатта Дэбдиргэтиттэн Чурапчы сэлиэнньэтигэр айаннаан испиттэр. Суоппар массыынаны  1987 сылтан ыытар бырааптаах эбит диэн ГИБДД пресс-сулууспата иһитиннэрдэ.

Алдан оройуонугар «Шакман» массыына  «Исудзу Форварды» кытары харсыһан, легковой массыына суоппара,  1999 сыллаах төрүөх киһи эчэйиини ылан балыыһаҕа киллэриллибит.

Мэҥэ Хаҥаласка «Тойота Королла» массыына   «Судзуки Гранд Витара» уонна «ТЛК» массыыналары кытары харсыһан, 3 киһи араас эчэйиини ыланнар балыыһаҕа киирбиттэр диэн  Дьуһуурунай борокуруор иһитиннэрэр.