Мария Нартахова аатынан Судаарыстыбаннай бириэмийэ олохтонно

Социальнай хааччыйыы эйгэтигэр Мария Нартахова аатынан СӨ Судаарыстыбаннай бириэмийэтэ олохтонно. Бу туһунан үлэ, социальнай сайдыы миниистирэ Елена Волкова иһитиннэрдэ. 

Бу бириэмийэ нэһилиэнньэни социальнай хааччыйыы эйгэтин үлэһиттэрин көҕүлүүр, статустарын үрдэтэр, наҕараадалыыр сыалтан олохтонно.

— Мария Дмитриевна бэйэтин кэмин чаҕылхай бэрэстэбиитэлэ этэ. Кини бөдөҥ сэбиэскэй-патрийнай салайааччы, судаарыстыбаннай, уопсастыбаннай диэйэтэл эрдэҕинэ, Саха АССР Сэбиэскэй Сойуус хотугулуу-илиҥҥи өттүгэр биир саамай сайдыылаах бырамыысыланнай  эрэгийиэҥҥэ кубулуйбута. Кини өрөспүүбүлүкэ социальнай-экэнэмиичэскэй, уопсастыбаннай-бэлитиичэскэй сайдыытыгар киллэрбит кылаата улахан, —  диэн миниистир эттэ.

М.Д. Нартахова аатынан Судаарыстыбаннай бириэмийэ Бүтүн Арассыыйатааҕы социальнай үлэһит күнүгэр — бэс ыйын 8 күнүгэр туттарыллыаҕа.

Бириэмийэ биир киһиэхэ, эбэтэр, кэлэктиипкэ туттарыллыан сөп. Кэлэктиипкэ бэриллэр түгэнигэр, хас биирдии чилиэнигэр диплом, түөскэ кэтиллэр бэлиэ туттарыллар, оттон харчынан бириэмийэтин хас биирдиилэригэр тэҥинэн үллэрэллэр.