Саха сирин архитектордара «ДальАрх» бириэмийэҕэ киирсэллэр: НОМАДО бюротун туһунан тугу билэбитий?

Хас биирдии сир, дойду бэйэтэ ураты тыыннаах. Архитектор сүрүн соруга — ол тыыны таба көрөн, арыйан дьоҥҥо-сэргэҕэ таһаарыы. НОМАДО архитектура бюрота бу ирдэбили тутуһан үлэлиир. Кинилэр бырайыактара билигин Уһук Илин уокурукка «ДальАрх» архитектурнай бириэмийэ икки номинациятыгар киирдилэр.

НОМАДО бюро үлэтин кыра эбийиэктэртэн — тиэргэннэртэн, кыра пааркалартан уонна олохтоох маршруттан саҕалаабыта. Салгыы хамаанда үлэтэ кэҥээн, куорат улахан бырайыактарыгар тиийбитэ. Ол курдук, Дьокуускай куоракка Роман Дмитриев аатынан набережнай уонна куорат пляһын концепцияларын оҥорсубуттара.

НОМАДО уопута уонна дьоҕура араас архитектурнай куонкурустарга үрдүктүк бэлиэтэннэ:

• 2022 сыллаахха Горнай улууһун кытта бииргэ «Эйгэ» бириэмийэ Гран-притын ылбыттара.
• 2024 сыллаахха тиэргэн территориятын бырайыагын иһин бэлиэтэммиттэрэ.
• Бу сылга «АРХ Москва» быыстапкаҕа «Некст» куонкурус түмүгүнэн Арассыыйа саамай бастыҥ эдэр архитектурнай бюротунан ааттаммыттара.
• 2025 сыллаахха кинилэр «Кут» диэн арт-бырайыактара үрдүк наҕарааданы туппута.

Билигин НОМАДО хамаандатын үлэлэрэ «ДальАрх» бириэмийэ финалистарын кэккэтигэр киирдилэр. Шорт-лиска икки бырайыак талылынна:

1. Чурапчы сэлиэнньэтигэр оҥоһуллубут «Чурапчы томтордоро» кыра паарката — «Бастыҥ тиэргэн территорията» номинацияҕа.
2. Горнай улууһун Маҥырас сэлиэнньэтин маастар-былаан — «Куорат бастыҥ мастар-былаана» номинацияҕа.

«ДальАрх-2026» бириэмийэ лауреаттарын наҕараадалыыр үөрүүлээх тэрээһин ахсынньы 2 күнүгэр Дьокуускай куоракка буолуоҕа. Биир дойдулаахтарбытыгар кыайыыны баҕарыаҕыҥ!