СӨ Үрдүкү Суута албыннаабыт юристан 500 тыһ.солк. тахса харчыны төлөттөрдө

СӨ Үрдүкү Суута дьоҥҥо юридическай көмө оҥоробун диэн албыннаан харчы ылбыт юрист-урбаанньыт дьыалатын көрдө. Ол түмүгэр оҥоһуллубатах өҥөтүн иһин 500 тыһ. солк. тахса сууманы төлөтөр туһунан быһаарыы сокуоннай күүһүгэр киирдэ.

2024 сыл ыам ыйыгар биир дьахтар моҥкуруукка уонна кыбартыыратын приватизациялаан баран атыылыырга көмөлөһөрүн көрдөөн юрист-урбаанньыкка тахсыбыт. Дьахтар ол күн тутатына бастаан 25 000 солк. биэрбит. Онтон алтынньыга 124 000 солк. кини счетугар ыыппыт, кэлин 150 000 солк. араспыыската суох кумааҕы харчынан туттарбыт.

Ол эрээри, юрист кэпсэтиллибит үлэни толорботох, моҥкуруука дьыалатын олох атын тэрилтэҕэ утаарбыт. Кэлин юрист туора киһинэн 100 000 солк. эрэ төннөрбүт. Итинтэн сылтаан дьахтар суукка үҥсүү түһэрбит.

Юрист бэйэтэ суукка кэлбэтэх. Бэрэстэбиитэлэ суукка кэлэн «харчыны кыбартыыраны бас билиигэ оҥорууга ылбыппыт» диэн мэлдьэһэ сатаабыт уонна бу дьыл олунньутугар оҥоһуллубут үлэни толоруу туһунан биир өттүттэн докумуон баарын көрдөрбүт.

Суут дьыаланы сокуоҥҥа олоҕуран көрбүт уонна маннык быһаарбыт: дьахтар харчыны биэрбитин дакаастыахтаах, оттон юрист — үлэни толорбутун быһаарыахтаах. Дьахтар 150 тыһ. солк. банкоматтан устубутун уонна офиска илдьэн биэрбитин баантан ыспыраапка уонна туоһулар  бигэргэппиттэр. Оттон юрист тугу үлэлээбитин туһунан биир да кумааҕыта,  туоһулуур докумуона суох буолан биэрбит.

Бастакы инстанция суута дьахтар ирдэбилин сорҕотун толорон, юристан уопсайа 537 000 солк. төлөтөргө уураахтаабыт:

• 174 000 солк. — сүрүн иэһэ;
• 174 000 солк. — болдьоҕу кэһии иһин;
• 10 000 солк. — моральнай хоромньу;
• 179 000 солк. — ыстараап.

Эппиэттээччи  быһаарыыны кытта сөбүлэспэккэ Саха сирин Үрдүкү Суутугар апелляция түһэрбит да, гражданскай дьыалаларга суут кэллиэгийэтэ бастакы уурааҕы уларыппатах диэн СӨ Сууттарын холбоһуктаах пресс-сулууспата суруйар.