Дьокуускайга маҕаһыынтан табаары уорбут 45 саастаах эр киһи тутулунна

Дьокуускайга биир улахан маҕаһыынтан 10 тыһыынча солк. тахса суумалаах аһы-үөлү уорбут эр киһини полиция үлэһиттэрэ туттулар. Уоруйах табаары бастаан маҕаһыын таачкатыгар укпут, онтон ким да көрбөтүнэн туһанан суумкатыгар уктан тахсыбыт.

ИДьМ «Дьокуускайдааҕы» управлениетын 4 №-дээх полиция салаатын дьуһуурунай чааһыгар атыы-эргиэн ситимин бэрэстэбиитэлэ 10 тыһыынча солк. тахса суумалаах табаардарын уордарбыттарын туһунан сайабылыанньа түһэрбит.

Полиция холуобунай ирдэбилин үлэһиттэрэ көрдүүр тэрээһиннэри ыытан, уорууга уорбаланар 45 саастаах куорат олохтооҕун туттулар.

Кэлин быһаарыллыбытынан, эр киһи маҕаһыын саалатыгар сылдьан бастаан араас аһы-үөлү атыылаһар таачкаҕа укпут. Онтон кинини ким да көрбөтүнэн туһанан, табаардары бэйэтин суумкатыгар уган албастаабыт уонна каассаҕа харчытын төлөөбөккө тахсан баран хаалбыт.

ИДьМ-тын «Дьокуускайдааҕы» управлениетын пресс-сулууспата иһитиннэрэринэн, билигин РФ Холуобунай кодексатын 158 ыстатыйатын 1 чааһынан («Уоруу») холуобунай дьыала тэрилиннэ.