Бүгүн Аҕа дойду Дьоруойдарын күнүгэр Мэҥэ Хаҥалас улууһугар «Снежный барс» байыаннай-спортивнай оонньуу улуустааҕы этааба саҕаланна.
Тэрээһини Мэҥэ Хаҥалас улууһун Сыымах нэһилиэгэр оробуочай сырыытыгар сылдьан кэмигэр Ил Дархан Айсен Николаев үөрүүлээхтик аста. Өрөспүүбүлүкэ Аҕа баһылыга «саха норуотуттан бастакы Сэбиэскэй Сойуус Дьоруойа Федор Попов фашизмтан босхолообут сиригэр-уотугар эмиэ нацизм үөскээн таҕыста. Саха сирин түөрт олохтооҕо Арассыыйа Дьоруойдарынан буоллулар. Бүгүҥҥү күҥҥэ сомоҕолоһуу хаһааҥҥытааҕар да суолталанан турар. Онон оскуола оҕолоро араас патриотическай тэрээһиннэргэ кыттан, бастыҥ үгэстэри салгыыллар», — диэн бэлиэтээтэ Ил Дархан.
СӨ Аҕа баһылыгын уонна Бырабыыталыстыбатын пресс-сулууспата иһитиннэрбитинэн, Айсен Николаев байыаннай-спортивнай оонньуу кыттыылаахтарыгар үгүс кыайыылары уонна ситиһиилэри баҕарда. Тэрээһин кыттыылаахтарын РФ Дьоруойа Александр Колесов эҕэрдэлээтэ. Бүгүҥҥү күҥҥэ улууска 20-тэн тахса байыаннай-спортивнай кулууп үлэлиир. Кинилэр истэригэр Афганистан сэриитин кыттыылаахтара Петр Филиппов, байыаннай дьайыы кыттыылааҕа Гаян Харлампьев, Сирияҕа уонна анал байыаннай эпэрээсийэ кыттыылааҕа, Афанасий Сергеев бааллар.
«Снежный барс» оонньуу икки бөлөҕүнэн – улахан уонна кыра оскуолаларга арахсан ыытыллыаҕа. Улуустааҕы түмүк тэрээһин олунньуга буолуоҕа. Кыайыылаахтар кулун тутар бүтэһигэр өрөспүүбүлүкэтээҕи финалга кыттыахтара.
Сэбиэскэй Сойуус Дьоруойа Федор Попов төрөөюүт Сыымаҕар 10-ча хамаанда Майаттан, Хараттан, Павловскайтан, Төҥүлүттэн, Аллараа Бэстээхтэн, Төхтүртэн, Хаптаҕайтан уонна Баатара оскуолатыттан кыттыахтара.
Сообщить об опечатке
Текст, который будет отправлен нашим редакторам: