Орто Халымаҕа сапыраапкаҕа турбут баһаар бохсулунна

Бүгүн Орто Халымаҕа  «Саханефтегазсбыт» сапыраапката умайбытын туһунан  иһитиннэрии тарҕанна.

«Саханефтегазсбыт»  АУо пресс-сулууспата иһитиннэрбитинэн, ахсынньы 19 күнүгэр күнүс 13 ч. 55 м.  (олохтоох бириэмэнэн) СӨ Баһаарынай сулууспатын  Орто Халыматааҕы  пуунун диспетчеригэр  Орто Халыма куоракка баар  «Саханефтегазсбыт» АЗС-гар баһаар  тахсыбытын туһунан иһитиннэрии киирбит.  Ол курдук,  уматыгы харайар  резервуарга  уонна   НЕФАЗ (КАМАЗ) бензовозка умайыы  тахсыбыт.

Баһаарынайдар  уонна АЗС үлэһиттэрин суһал үлэлэрин түмүгэр,   14 ч. 30 м.  (олохтоох бириэмэнэн)  сапыраапкаҕа турбут баһаар бохсуллубут.  Баһаарга ким да эмсэҕэлээбэтэх, ньиэп бородууктата тохтубатах диэн хампаанньа пресс-сулууспата иһитиннэрдэ. Билигин баһаар  туохтан тахсыбытын быһаараллар.