Саха сиригэр «Сүрэхпин оҕолорго аныыбын – 2024» куонкурус саҕаланна

Саха сиригэр «Сүрэхпин оҕолорго аныыбын – 2024» эбии үөрэхтээһин сүрүн тэрээһинэ ыытыллар.

Муус устар 10-11 күннэригэр Дьокуускайга Бүтүн Арассыыйатааҕы «Сүрэхпин оҕолорго аныыбын – 2024» эбии үөрэхтээһин эйгэтин үлэһиттэрин идэтийбит маастарыстыбаларын көрүүгэ өрөспүүбүлүкэтээҕи түһүмэҕэ  саҕаланна.

Тэрийээччилэр бэлиэтииллэринэн, куонкуруска кыттыы эбии үөрэхтээһиҥҥэ педагог ыстаатыһын үрдэтэр, бастыҥ практикаларын уонна педагогическай каадырдары булар кыаҕы биэрэр. Быйыл Арассыыйатааҕы куонкурус өрөспүүбүлүкэтээҕи түһүмэҕэр 43 педагог 8 номинациянан кытталлар. Куонкурус финала икки туртан турар. Бастакы турга бырайыактары оҥороллор. Түмүгэр 8 номинация кыайыылааҕа быһаарыллан, иккис турга киирсиэхтэрэ.

Финал түмүгүнэн хас биирдии номинация кыайыылаахтара уонна лауреаттара быһаарыллыахтара. Бары номинациялар кыайыылаахтарын  Бүтүн Арассыыйатааҕы «Сүрэхпин оҕолорго аныыбын – 2024» эбии үөрэхтээһин эйгэтин үлэһиттэрин идэтийбит маастарыстыбаларын күрэххэ кыттарга сүбэлиэхтэрэ.

«Сүрэхпин оҕолорго аныыбын – 2024» куонкурус 1998 сылтан ыытыллар. Тэрийээччилэринэн СӨ Үөрэҕин уонна билимин министиэристибэтэ уонна «Юные якутяне» өрөспүүбүлүкэтээҕи ресурснай киинэ буолаллар.

СӨ Ил Дарханын уонна Бырабыыталыстыбатын пресс-сулууспата