Саха сирин эмчиттэрэ Ростов-на-Дону госпиталыгар байыаннай быраастарга көмөлөһөллөр

Саха сирин баһылыга Айсен Николаев сорудаҕынан,  өрөспүүбүлүкэтээҕи доруобуйа уопсастыбаннай киинин уонна мэдиссиинискэй профилактика кылаабынай бырааһа 
Алена Никитина салайааччылаах быраастар биригээдэлэрэ Ростов уобалаһыгар баар РФ Оборуонаҕа министиэристибэтин уокуруктааҕы байыаннай клиническэй госпиталыгар салгыы үлэлиэхтэрэ. 

Алена Никитина  Севастопольга Арассыыйа Оборонаҕа  министиэристибэтин Пирогов аатынан 1472 байыаннай-муоратааҕы клиническэй госпиталыгар хас да күн үлэлээтэ. Севастопольга байыаннай госпитальга Саха сирин бааһырбыт байыастара киирэллэр. Саха сириттэн анал байыаннай эпэрээссийэҕэ кытта сылдьан бааһырбыт байыастар туһунан иһитиннэриини Ростовка баар быраастарга ыыталларын туһунан байыаннай быраастары кытта дуогабардаста.

“Саха сирин байыастарын кытта салгыы үлэлэһэбит, кинилэри өйүүбүт. Улахан көмөнү Айсен Николаев сорудаҕынан РФ Бэрэсидьиэнин иһинэн өрөспүүбүлүкэ Бастайааннай бэрэстэбиитэлистибэтигэр тэриллибит Биир кэлим сүрүннүүр киин бэрэстэбиитэллэрэ, ону тэҥэ Саха сириттэн төрүттээх, Ростовка олорор волонтердар оҥороллор”, — диэтэ Алена Никитина.

Салгыы кини Саха сириттэн төрүттээх Олег Саранцев туһунан кэпсээтэ. “Олег Юрьевич Өлүөхүмэ оройуонуттан төрүттээх, өр сыл Хаҥалас улууһугар олорбута. Билигин Ростов-на-Дону куоракка олорор, урбаанньыт уонна Саха сирин  байыастарыгар уонна волонтердарга көмөлөһөр.  Байыастарга босхо таҥас атыылаһан биэрэр, тырааныспарынан хааччыйар. Олег Саранцев олус дойдумсаҕын көрдөрдө.  Онон быраастар уонна байыастар ааттарыттан истиҥник махтанабын”, — диэтэ Алена Никитина.

Санаттахха, Ростовка быраастар мобильнай биригээдэлэрэ маннык састааптаах үлэлиир: Өлөөннөөҕү киин балыыһа кылаабынай бырааһа, хирург-быраас Назар Петров, суутмедэспиэр-быраас, хирург-быраас Анатолий Слепцов, Мэдиссиинэ национальнай киинин Педиатрия киинин травматология отделениетын сэбиэдиссэйэ , травматолог-быраас Сергей Васильев, психиатр-быраас Туяра Решетникова уонна быраастары салайааччы Алена Никитина.

Саха Өрөспүүбүлүкэтин Ил Дархана уонна Саха  Өрөспүүбүлүкэтин Бырабыыталыстыбатын пресс-сулууспата