Саха сириттэн 100 киилэ аһы-үөлү үөрэнэ, эмтэнэ сылдьар байыастарга тиксэрдилэр

100 киилэ бородууктаны уонна сахалыы аһы-үөлү “Саха волонтер” хамсааһын ахтыбыыстара хомуйан, Князе-Волконскайдааҕы байыаннай кииҥҥэ уонна Хабаровскай, Приморскай кыраай госпиталларыгар Саха сирин Уһук Илиҥҥи бастайааннай бэрэстэбиитэлистибэтин үлэһиттэрин кытта тиксэрдилэр.

“Бу ас-үөл «Якутия с тобой!» хамсааһын өрөспүүбүлүкэтээҕи ыстаабыгар хомуллубута уонна сөмөлүөтүнэн координационнай кииммитигэр тиксэриллибитэ. Тоҥоруллубут бородуукталары бэрт суһаллык сулууспалыы уонна эмтэнэ сылдьар саллааттарга тиксэрдибит. Өрөспүүбүлүкэ бэрэстэбиитэллэрэ бу күннэргэ күүрээннээх үлэни ыыта сылдьаллар, үгүс үлэ байыаннай дьайыыга кытта сылдьар байыаннайдарга юридическай көмөнү оҥорууга ананар. Бэҕэһээ байыаннай-врачебнай хамыыһыйаны ааһан реабилитацияҕа дьиэлээн иһэр үс байыаһы мантан атаардыбыт”, — диэн Уһук Илин эрэгийиэҥҥэ Саха сирин бастайааннай бэрэстэбиитэлин солбуйааччы Валерий Протопопов кэпсээтэ.