Сардаана Кононова: «Мэдиссиинэ тэрилтэлэрин базаларын бөҕөргөтүүгэ болҕомто ууруллар»

Бүгүн Саха сирин уопсастыбаннаһа Ил Дархан Айсен Николаев Анал этиитин ырытыһар. Тааттатааҕы киин балыыһа кылаабынай бырааһа Сардаана Кононова тус санаатын үллэһиннэ:

— Ил Дархан А.С. Николаев Ил Түмэҥҥэ туһаайбыт Анал этиитин истэн баран, өрөспүүбүлүкэбит бырабыыталыстыбата мэдиссиинэ тэрилтэлэрин материальнай-техническэй базаларын бөҕөргөтүүгэ, каадырдары олохсутууга тиһиктээх үлэни ыытарын бэлиэтиэхпин баҕарабын.

Биһиги улууспутугар кэнники икки сылга 2 быраастаах амбулатория, 1 биэлсэр-акушер пууна уонна быйыл сэтинньи ыйга оройуоннааҕы киин балыыһа поликлиниката тутуллан киирдилэр. Поликлиника симиэнэҕэ 200 киһини көрөр кыахтаах, аныгылыы, тупсаҕай көстүүлээх, толору хааччыллыылаах.

Бу үлэ түмүгүн киһи олоҕун орто уһуна 73,5 сылга диэри уһаабытыгар уонна нэһилиэнньэ ахсаана эбиллэ турарыгар көрөбүт. Бу улахан үлэ түмүгэ буолар. 2024 сыл Оҕо саас сылынан биллэриллибитэ ордук үөрдэр. Ийэ буолууга, оҕолор доруобуйаларыгар ураты болҕомто ууруллар. Бу үлэ барыта уопсастыбабыт инникитигэр туһуланар, норуот кэсилин быһаарар.