ТУСКУЛ: «Өрөбүлтэн Арктическай антициклон кэлэн, хаар, ардах, тымныы…»

Норуот синоптига Тускул «Тэтим» араадьыйаҕа ыам ыйын 5-9 күннэригэр халлаан туругун иһитиннэрдэ.

«Бу күннэргэ Арктическай антициклон кэлэн, Саха сиригэр биллэ тымныйыаҕа. Өрөбүл күннэргэ сөҥүү түһэн, кэлэр нэдиэлэҕэ  сыыйа тымныйан барыаҕа. Киин улуустарга түүн -5 кыраадыска тиийэ тымныйыаҕа. Бүлүү бөлөх улуустарга, Өлүөхүмэҕэ, Алдаҥҥа, Нерюнгрига хаар, ардах түһүөҕэ. Түүн -8 кыраадыска тиийэ биллэ тымныйыаҕа.

Саамай тымныы күннэр — Арктическай улуустарга. Верхоянскай куоракка  ыам ыйын 9 күнүгэр  түүн -13, күнүс 3 кыраадыс тымныы.   Баатаҕай Алыытыгар, түүн -17, күнүс -6 кыраадыс тымныы. Депутатскайга түүн — 19, күнүс 8 кыраадыс тымныы.

Халыма эҥээр улуустарга  түүн тымныйар, күнүс сылыйар. Ол курдук, Халыма эҥээр, быһа холуйан, түүн  -8 кыраадыс тымныы, күнүс +7 кыраадыс сылаас. Өймөкөөҥҥө -5 кыраадыс түүн тымныытын биллэриэ, күнүс +7  кыраадыс сылаас.  Муомаҕа -7 тымныы, күнүс +1 кыраадыс сылаас.

Киин куоракка түүн -4, күнүс -3 кыраадыс тымныы. Онон үгүс улуустарга ыам ыйын 7-9 күннэригэр биллэ тымныйыаҕа. Ордук ыам ыйын 12 күнүгэр диэри -6 кыраадыс тымныйан, улахан тоҥоруу буолуо.

Халлаан ыам ыйын 14 күнүттэн сыыйа көнөн, сылыйан барыаҕа.