Урбаан миниистирэ Тимур Ханды быһа эпииргэ сонун бырайыактары билиһиннэрдэ

СӨ урбааҥҥа, эргиэҥҥэ уонна туризм сайдыытын миниистирэ Тимур Ханды бүгүн, ыам ыйын 25 күнүгэр,  Арассыыйа урбаанньыттарын күнүн көрсө быһа эпииргэ тахсан, санаатын үллэһиннэ, кэскиллээх бырайыактары билиһиннэрдэ.

Миниистир бэлиэтээбитинэн, быйылгы сыл саҥатыттан өрөспүүбүлүкэҕэ урбаанньыт ахсаана элбээбит – 41969 киһиэхэ тиийбит. “Ый аайы бэйэ дьыалатын арыныан баҕалаах дьон 4% эбиллэр. Бу аата урбаан эйгэтэ кэскиллээҕин бэлиэтэ. Бэйэ дьыалатын арыныан баҕалаах дьоҥҥо анаан пилотнай бырайыак үлэлэтэр буолан, бүгүҥҥү күҥҥэ 30-тан тахса тыһыынча бэйэ дьыалатынан дьарыктанааччы баар буолла. Норуот хаһаайыстыбатын бары салааларыгар бу хайысханы сайыннаран эрэллэрэ үөрүүлээх суол», — диэн бэлиэтээтэ Тимур Ханды.

Салгыы миниистир нолуокка уонна субсидияҕа өйөбүл миэрэлэрин билиһиннэрдэ. Национальнай бырайыак чэрчитинэн  эдэр дьоҥҥо 25 саастарыгар диэри уонна социальнай хайысханан дьарыктанар урбаанньыттарга  чэпчэтии көрүллэрин бэлиэтээтэ.  Былырыын маннык өйөбүлүнэн 82 урбаанньыт туһаммыт.

Үгүс урбаанньыт сүрүннээн туризмы сайыннарыыга сыһыаннаах ыйытыылары биэрдэ. «Биир үтүө сонуну кытта үллэстиэхпин баҕарабын. Былырыын Саха сирэ «Туризм уонна ыалдьытымсах буолуу индустрията» саҥа  бырайыак куонкуруһугар кыайан,  Арассыыйа кыайыылаах  эрэгийиэннэрин испииһэгэр киирбитэ. Бырайыак чэрчитинэн  67 мөлүйүөн солкуобайы ылан, бэйэбитигэ бу үбүлээһини үллэриигэ куонкурус биллэрбиппитигэр, 22 урбаанньыт сайаапка биэрбитэ.  Субсидияны үллэрии тэрээһинэ  бэс ыйыгар саҕаланыаҕа. Атырдьах ыйыгар урбаанньыттар  харчыларын ылыахтара. Куонкурус сүрүн ирдэбилэ, холобура, урбаанньыт 6 мөлүөйүн солкуобайы ыларыгар 50%-нын (3 мөл. солкуобайы) бэйэтэ үбүлүүр», — диэн быһаарда. Миниистиртэн ити куонкуруска хайдах кыттыахха, туох докумуоннар ирдэнэллэрин ыйыттылар.  Онуоха Тимур Ханды «Саайпытыгар барытын биллэрэ, иһитиннэрэ олоробут, ону көрүҥ. Сайаапкаҕытын почтанан ыытыаххытын сөп. Докумуон толору бакыатын хомуйа сатааҥ, биир эмэ докумуон суох буолла да, ааспаккыт», — диэн бэлиэтээтэ миниистир.

… Ити курдук урбаан миниистирэ урбаанньыттар идэлээх бырааһынньыктарын иннинэ үгүс сонун иһитиннэриини оҥордо.