Саха сиригэр быйыл 29 тыһыынча дьиэ кэргэҥҥэ баһаары сэрэтэр датчиктары туруордулар

Саха сиригэр бу сыл тоҕус ыйын түмүгүнэн баһаартан куттала суох буолууну хааччыйар үлэ хайдах барбытын ырыттылар. Бу боппуруоска анаммыт мунньаҕы өрөспүүбүлүкэ бырабыыталыстыбатын бэрэссэдээтэлин бастакы солбуйааччы Николай Бочков ыытта.

Баһаары сэрэтэр үлэ сүрүн хайысхатынан олорор дьиэлэргэ баһаары биллэрэр датчиктары туруоруу буолар. Билиҥҥи туругунан, өрөспүүбүлүкэ испииһэгэр киирбит 50,5 тыһыынча дьиэ кэргэнтэн 29 тыһыынчата маннык датчиктарынан уонна сигнализациянан хааччылынна. Бу үлэ салгыы ыытыллыаҕа.

Сыл саҕаланыаҕыттан исписэлиистэр 3,5 тыһыынчаттан тахса профилактическай рейдэни оҥордулар. Дьон дьиэтигэр сылдьан, оһохтор уонна уот ситимин туруктарын бэрэбиэркэлээтилэр, ону таһынан баһаартан сэрэхтээх буолуу быраабылаларын санаттылар. Социальнай тэрилтэлэргэ баһаары умуруорар тэриллэри туруоруу уонна итэҕэстэри туоратыы үлэтэ барар.

Мунньахха нэһилиэктэри айылҕа баһаарыттан көмүскээһиҥҥэ болҕомто эмиэ уурулунна. Быйыл өрөспүүбүлүкэҕэ 1 290 км уһуннаах минерализованнай балаһалар уонна 685 км уһуннаах баһаары утары хаһыылар саҥардылыннылар.

«Саха сиригэр элбэх нэһилиэк тыаҕа сыста турар, онон уот дьон олорор дьиэлэригэр уонна социальнай эбийиэктэргэ киирбэтин туһугар эрдэттэн дьаһанарбыт олус суолталаах. Маннык бииргэ ыытыллар сэрэтэр үлэ дьон олоҕун, дьиэтин-уотун харыстыырга көмөлөһөр», — диэн бэлиэтээтэ Николай Бочков.

Мунньах түмүгүнэн муниципальнай тэриллиилэргэ быйылгы сылга былааннаммыт үлэлэри толорорго, баһаары биллэрэр датчиктары туруорууну салгыырга уонна баҕа өттүнэн баһаарынай харабыл үлэтин күүһүрдэргэ сорудахтар бэрилиннилэр.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.

Сиһилии манна ааҕыҥ: https://www.sakha.gov.ru/news/68133