Роспотребнадзор сэрэтэр: Арассыыйаҕа дьон тумуунан ыалдьыбыта элбиир

Арассыыйаҕа дьон тумуунан ыалдьыбыт көрдөрүүтэ салгыы үрдээн иһэр. Ааспыт нэдиэлэҕэ дойду үрдүнэн 614 тыһыынчаттан тахса киһи ОРВИ-нан, тумуунан уонна COVID-19 сыстыганнаах ыарыыларынан ыалдьыбыта бэлиэтэммит. Бу туһунан алтынньы 27 күнүгэр Роспотребнадзор иһитиннэрдэ.

«Бу сыл 43-с нэдиэлэтигэр  ОРВИ-нан, тумуунан уонна COVID-19 ыарыыларынан 614 тыһыынчаттан тахса киһи ыалдьыбыта бэлиэтэннэ», — диэн биэдэмистибэ Макс социальнай ситимигэр суруйда. Роспотребнадзор чуолаан дьон тумуунан ыалдьыытын көрдөрүүтэ улаатан иһэрин бэлиэтээтэ.

Ханнык вирустар тарҕаналларый?

Билигин дьону ыарытыннарар вирустар 95,2% — тумууга киирбэт вирустар буолаллар эбит. Ол иһигэр:

• Риновирустар — 44,6%;
• Парагрипп — 17%;
• Оттон кириип вирустара 4,8% ылаллар (маныаха А (H1N1), A (H3N2), B уонна C көрүҥнэрэ бааллара билиннэ).

Быһыыны биэрии хайдах барарый?

Биэдэмистибэ иһитиннэрэринэн, бүгүн дойду үрдүнэн 31,4 мөлүйүөнтэн тахса киһи тумууну утары быһыыны ылбыт. Эрдэ иһитиннэриллибитин курдук, биллиилээх эпидемиолог Геннадий Онищенко Арассыыйаҕа ОРВИ ыарыытын күүскэ тарҕанар кэмэ чугаһаабытынан, тумууну утары быһыыны биэрии хампаанньатын түргэтэтэргэ ыҥырбыта.

Санаттахха, СӨ Доруобуйа харыстабылын министиэристибэтэ иһитиннэрбитинэн, алтынньы 8 күнүнээҕи туругунан 150 095 киһи кирииби утары быһыыны ылбыт. Ол иһигэр 74 484-дэ оҕо, оттон 75 611-э улахан киһи.

Саха сиригэр 150 тыһ. тахса киһи кирииптэн утары быһыыны ылла