Сомоҕолоһуу күнүгэр Дьокуускайга норуот оҥоһуктарыгар босхо маастар-кылаастар буолуохтара

Сэтинньи 4-6 күннэригэр Дьокуускайга Сомоҕолоһуу күнүгэр аналлаах норуот уус-уран оҥоһуктарыгар босхо маастар-кылаастары ыытыахтара. Тэрээһини «Мин биисинэһим» киин тэрийэр. Киин куорат олохтоохторо уонна ыалдьыттара саха төрүт үгэстэрин кытта билсиэхтэрэ уонна бэйэлэрин илиилэринэн оҥоһуктары оҥоруохтара.

Саха сиригэр урбаанньыттары өйөөһүн Арассыыйа Бэрэсидьиэнэ Владимир Путин көҕүлээбит «Көдьүүстээх уонна күрэстэһэр кыахтаах экэниэмикэ» национальнай бырайыак чэрчитинэн барар.

Кыттааччылары үс айар көрсүһүү күүтэр. Уопуттаах маастардар кинилэри норуот декоративнай-прикладной ускуустуба уратыларын кытта билиһиннэриэхтэрэ. Бырагыраамаҕа иһити ойуулааһын, куукуланы уонна айылҕа таастарыттан харысхалы оҥоруу киирэр.

Бастакы маастар-кылаас сэтинньи 4 күнүгэр 10:00 чааска буолуоҕа: Кыайыы 40 сыла түөлбэ, 3/1 нүөмэрдээх дьиэтигэр. «Көмүлүөк» хампаанньа бэрэстэбиитэллэрэ саха иһитин ойуулааһыҥҥа дьарыгы ыытыахтара. Кыттааччылар оҥоһуктары киэргэтии уратыларын кытта билсиэхтэрэ уонна бэйэлэрэ ойуулаан холонон көрүөхтэрэ.

Сэтинньи 5 күнүгэр 16:00 чааска Киров уулуссатын 18 нүөмэрдээх дьиэтин, Б блогар, маастар Сардана Олесова «Северяночка» саха куукулатын оҥорууга дьарыгы ыытыаҕа. Кыттааччылар төрүт куукуланы оҥоруу үгэстэрин кытта билсиэхтэрэ уонна бэйэлэрин оҥоһуктарын айыахтара.

Бырагыраама сэтинньи 6 күнүгэр 16:00 чааска «Туораах ытарҕа» диэн айылҕа таастарыттан харысхалы оҥорууга маастар-кылааһынан түмүктэниэҕэ. Дьарыгы маастар Изабелла Павлова Киров уулуссатын 18 нүөмэрдээх дьиэтин, блок Б аадырыһыгар ыытыаҕа.

Тэрийээччилэр бэлиэтииллэринэн, маннык тэрээһиннэр дьону Саха сирин норуоттарын култуурунай нэһилиэстибэтин кытта билиһиннэрэллэр, төрүт үгэскэ интэриэһи сайыннараллар уонна норуот уус-уран оҥоһуктарын харыстыырга көмөлөһөллөр.

Бары маастар-кылаастарга кыттыы босхо. Ол гынан баран, миэстэ ахсаана хааччахтаах – хас биирдии дьарыкка 10-тан элбэҕэ суох кыттааччы. Баҕалаах киһи бырагырааматтан биир эрэ маастар-кылааска суруйтарыан сөп.

Барыллаан бэлиэтээһин бу сигэнэн ыытыллар: https://clck.ru/3WgyCd.

Судаарыстыбаттан өйөбүл, куонкурустары, быыстапкалары уонна инники тэрээһиннэр туһунан «Мин биисинэһим» мойбизнес14.рф порталтан, киин социальнай ситимнэриттэн, ону тэҥэ, “суһал лиинньийэ” төлөпүөнүнэн 8 (800) 100-58-80 билсиэххитин сөп. Бу туһунан Ил Дархан уонна Бырабыыталыстыба пресс-сулууспата суруйар.