Кыайыы күнүн көрсө ыраастааһын аахсыйата
Улуу Кыайыы 79 сылын туолар үөрүүлээх күнэ чугаһаан иһэр. Аҕыйах хонугунан Кыайыы күнүн, эйэлээх олох иһин сырдык тыыннарын толук уурбут, кыайыыны уһансыбыт аҕаларбыт, эһэлэрбит үтүө ааттарын, хорсун быһыыларын ахтан-санаан, кэриэстээн ааһыахпыт.
Саха сирин үрдүнэн бу ураты бэлиэ күҥҥэ аналлаах араас тэрээһиннэр ыытыллаллар. Үөһээ Бүлүү үлэһит, көхтөөх ыччата онтон туора турбат, бу тэрээһин кэлэр көлүөнэ төрөөбүт дойдулара сайдарын туһугар үлэлииргэ-хамсыырга, кыайыыны уһансыбыт дьоммутугар ытыктыырга, кинилэринэн киэн туттарга туһуланар диэн иһитиннэрэр улуус дьаһалтатын пресс-сулууспата.
Бүгүн Үөһээ Бүлүү улууһун кэскиллээх ыччата Улуу Кыайыы 79 сылын көрсө экологическай аахсыйаны ыытта. Ыччаттар бэйэлэрин баҕаларынан уулууссалары ыраастаатылар, дьон тоҕуоруһан сынньанар сирдэрин, өйдөбүнньүк сирдэри хомуйдулар.
«Бу тэрээһин ыччаты патриотичекай тыыҥҥа иитиигэ, дойдуну таптыырга, Аҕа дойду сэриитигэр Улуу Кыайыыны уһансыбыт дьоммутунан киэн туттарга үтүө холобурунан буолар. Биһиги ыччаттарбыт ис санааларыттан бэйэлэрин баҕаларынан маннык тэрээһиннэргэ кытталлара хайҕаллаах, ол аата дойдубут сайдар кэскиллээх, сарсыҥҥыга эрэллээх», — диэн Үөһээ Бүлүү уууһун баһылыга Валерий Николаев санаатын үллэһиннэ.
Сообщить об опечатке
Текст, который будет отправлен нашим редакторам: