Новосибирскай уобалаһын сэлиэнньэтигэр пастереллез ыарыыта турбут

Былаастар иһитиннэрбиттэринэн, Новосибирскай уобалас Козиха сэлиэнньэтигэр пастереллез ыарыыта турбут. Онно  тахсар суоллары барытын хаарынан көмпүттэр уонна харантыын биллэрбиттэр. Олохтоохторго сүөһүлэрин барытын өлөрөргө дьаһайбыттар.

Ол эрээри тыа дьоно маны утарбыттар. Кинилэр этэллэринэн, туох да ыраастааһын үлэтэ (обработка) ыытыллыбатах, анаалыстар ылыллыбатахтар. Ынахтар доруобайдар, онон кинилэри өлөттөрүөхпүт суоҕа дииллэр. Козихаҕа тыа хаһаайыстыбата дьон сүрүн дохуот киллэринэр дьарыга буолар.

Readovka суруйарынан, оройуон баһылыга Олег Орел олохтоохтору кытта көрсүһүүгэ ыарыы турбутун бигэргэтэр туох баар докумуоннардааҕын, ол эрээри көрсүһүүгэ илдьэ кэлэрин умнубутун эппит. Тыа хаһаайыстыбатын министиэристибэтигэр өлөрүллүбүт сүөһүгэ толуйуу төлүүргэ эрэннэрбиттэр — биир киилэ эккэ 170 солкуобай.

Таабырыннаах «ураты кутталлаах ыарыы» туһунан устуоруйа салҕанар. Интэриниэт ситимигэр сүөһүнү былдьааһыны уонна уматыыны утарар дьон видеороликтара толордулар. Үгүс дьиэ кэргэҥҥэ бэйэтин хаһаайыстыбата — аһыыр-таҥнар соҕотох төрүөтэ буолар, тыаҕа үлэ аҕыйах уонна барыларыгар тиийбэт. Онон бу быһыы-майгы түргэнник тарҕанан аймалҕаны таһаарда.

Балаһыанньаны улахан хаһаайыстыбалар сүөһүлэрин ким да тыыппата өссө уустугурдар — онно, үгэс курдук, көннөрү харантыынынан муҥурданаллар. Бу олохтоох нэһилиэнньэ ортотугар улахан хампаанньалар (бизнесменнэр) интэриэстэригэр тус көмө хаһаайыстыбалар сүөһүлэрин соруйан өлөртүүллэр диэн сурахтары тарҕатта.

Тыа хаһаайыстыбатын сүөһүлэрин маассабайдык өлөрүү Пензенскэй уобаласка диэри элбэх эрэгийиэҥҥэ бэлиэтэнэр. Алтай кыраайыгар уонна Новосибирскай уобаласка тыһыынчанан ынах өлөрүлүннэ. Дьон түмсэн,  харысхал көстүүмнээх үлэһиттэри тохтотоору суоллары бүөлүүллэр.

Бу быһыыга-майгыга Силиэстийэлиир кэмитиэт болҕомтотун тарта. Олохтоохтор бэрэсидьиэҥҥэ туһаайыыларын уонна СМИ-лэргэ тахсыбыт иһитиннэррилэр кэннилэриттэн Новосибирскайдааҕы тыа хаһаайыстыбатын министиэристибэтин дуоһунастаах дьоннорун дьалаҕайдык сыһыаннаһыыларыгар бэрэбиэркэ саҕаланна.