Покровскай куорат чугаһынан муус аннынан балыктааһыҥҥа «Лена-фест» бэстибээл ыытыллыаҕа

Кулун тутар 29 күнүгэр аатырбыт балыксыт Евгений Гребнев сырдык аатыгар анаммыт муус аннынан балыктааһыҥҥа уонна көхтөөх сынньалаҥҥа «Лена-фест» бэстибээлэ буолуоҕа. Кини чиэһигэр балыктааһыны сөбүлээччилэргэ үгэс буолбут сааскы бырааһынньык ыытыллыаҕа. Күрэхтэһии Хаҥалас улууһугар Покровскай куорат чугаһынан Дьөппөн үөһүгэр (Жемконская протока) буолуоҕа.

Бэстибээл бырагыраамата:

• 8:30 — 9:00 — тэрээһиҥҥэ кыттааччылары түмүү, бэлиэтээһин (регистрация);
• 9:00 — 9:30 — бэстибээли үөрүүлээхтик арыйыы;
• 9:30 — 13:00 — балыктааһыҥҥа күрэхтэһии;
• 10:00 — 11:30 — ыалдьыттарга анаммыт көрдөөх-сынньатар тэрээһиннэр;
• 13:00 — 14:00 — балыгы ыйааһыннааһын, түмүгү таһаарыы, судьуйалар үлэлэрэ;
• 14:00 — кыайыылаахтары уонна бириистээх миэстэни ылбыттары наҕараадалааһын, уопсай хаартыскаҕа түһүү;
• 14:30 — 15:00 — тулалыыр сири-уоту хомуйуу.

Күрэхтэһиигэ  ким баҕалаах кыттыан сөп. Сайаапканы кулун тутар 29 күнүгэр диэр 8 (411) 444-17-55 төлөпүөнүнэн эбэтэр hang_psch2@gov14.ru электроннай буостанан ылаллар. Ону тэҥэ, тэрээһин буолар сиригэр сарсыарда 8:45 чааска диэри сайаапканы биэриэххэ сөп. Биир хамаандаттан (3 киһи) кыттар усунуос 1000 солкуобайга тэҥнэһэр, оттон «Аҕа уонна уол» хамаандаттан усунуос төлөммөт (босхо).

«Аҕа уонна уол» хамаанда: Төрөппүт (аҕата эбэтэр ийэтэ), эбээтэ эбэтэр эһээтэ уонна оҕото (уола эбэтэр кыыһа) 17 сааһыгар диэри кытталлара көҥүллэнэр. Хамаанда ахсаана хааччахтаммат.

Анал ааттар:

• хамаанданан — 1, 2, 3 миэстэлэр;
• лууҥканы үттээһин- 1, 2, 3 миэстэлэр;
• тус первенствоҕа кыайыылаахтар — 1, 2, 3 миэстэлэр;
• бастакы балык;
• саамай бөдөҥ балык;
• күндү балык;
• саамай айар куттаах (креативнай) хамаанда (биир формалаах);
• саамай балыксыт дьиэ кэргэн.