Мииринэйгэ оҕо оонньуура бэстилиэттээх эр киһи дьону куттаабыт

Саха сирин борокуратуурата ааспыт суукка устата өрөспүүбүлүкэ үрдүнэн бэлиэтэммит быһылааннар тустарынан иһитиннэрэр. Бу кэм иһигэр 2 холуобунай дьыала бэлиэтэннэ.

Дьыалалары чинчийии уонна бэрэбиэркэлиир үлэни борокуратуура кытаанах хонтуруолугар ылла.

Мииринэй куоракка биир бар кассирыттан сайабылыанньа киирбит. Биллибэт киһи бэстилиэккэ маарынныыр тэрилинэн куттаан, арыгыны аһаҕастык уора сатаабыт. Быраабы араҥаччылыыр уорганнар үлэһиттэрэ уорбаланааччыны итии суолунан туппуттар, киниттэн оҕо оонньуур бэстилиэтэ былдьаммыт. Билигин холуобунай дьыала тэрилиннэ.

Нерюнгри куоракка улахан суумалаах харчыны ороскуоттааһыҥҥа холуобунай дьыала аһылынна. Ол курдук, олохтоохтортон ититэр ситим өҥөтүн иһин төлөбүр быһыытынан киирбит 858 тыһыынча солкуобайтан тахса суумалаах харчыны ороскуоттаабыттара билиннэ. 

Ааспыт сууккаҕа өрөспүүбүлүкэ суолларыгар киһи өлүүлээх суол быһылаана тахсыбатах. Ол эрээри, ГАИ үлэһиттэрэ уруулга итирик олорон массыынаны ыыппыт 15 суоппары тутан, эппиэккэ тартылар.