Ахсынньы 1 күнүттэн чэпчэтиилээх автокирэдьиит бырагыраамата сөргүтүллүөҕэ

Арассыыйаҕа чэпчэтиилээх автокирэдьиит бырагыраамата ахсынньы 1 күнүттэн саҥаттан үлэтин саҕалыаҕа. Бу туһунан РИА Новости ааҕыныстыбаҕа Арассыыйа бастакы вице-премьерэ Денис Мантуров иһитиннэрдэ.

Мантуров бэлиэтииринэн,  бырагыраама 2027 сыллааҕы үп-харчы лимиититтэн көрүллэн сөргүтүллэр уонна массыына оҥорооччуларга да, суоппардарга да улахан көмөнөн буолуоҕа.

Кимнээх чэпчэтиинэн туһанар кыахтаахтарый?

• Эмчиттэр (мэдиссиинэ үлэһиттэрэ);
• Үөрэхтээһин эйгэтин үлэһиттэрэ (учууталлар, иитээччилэр);
• АБДь кыттыылаахтара уонна кинилэр дьиэ кэргэттэрэ;
• Инбэлииттэр;
• Икки уонна онтон элбэх оҕолоох ыаллар.

Массыына сыанатыттан чэпчэтии кээмэйэ төһөнүй?

• 25% — Уһук Илин (ол иһигэр Саха сирин) олохтоохторугар көннөрү (уматыгынан барар) массыынаны атыылаһарга. Атын эрэгийиэннэргэ чэпчэтии 20% тэҥнэһэр;
• 35% — электромобиль атыылаһарга (ол эрээри чэпчэтии суумата 925 тыһ. солкуобайтан үрдүө суохтаах);
• 40% — байыаннай дьайыыларга бааһырбыт дьоҥҥо;
• 10% — икки уонна онтон элбэх оҕолоох ыалларга.