Түүн «Жигули» массыынаттан 40 лиитирэ бэнсиини уорбут эдэр киһи тутулунна

Дьокуускай куорат 1-кы №-дээх полициятын отделыгар олохтоох киһи үҥсүү түһэрбит. Кини массыынатын бааҕыттан биллибэт киһи бэнсиини куттан ылбытын бэлиэтээбит. Ночоотун суумата 3 000 солкуобайтан тахса буолбут.

Силиэстийэ быһаарбытынан, эмсэҕэлээччи бэйэтин «ВАЗ-2107»  массыынатын элбэх кыбартыыралаах дьиэ тиэргэнигэр хаалларбыт. Түүнүн массыынаҕа биллибэт киһи кэлэн, шланганан 40 лиитирэ бэнсиини канистраҕа оботторон ылбыт. Уорбут уматыгын уоруйах бэйэтин массыынатыгар куттубут.

ИДьМ пресс-сулууспата иһитиннэрэринэн, полиция үлэһиттэрэ көрдүүр үлэлэрин түмүгүнэн буруйдааҕы тута булбуттар. Кининэн Дьокуускай куорат 21 саастаах олохтооҕо буолара быһаарыллыбыт. Билигин киниэхэ РФ Холуобунай кодексатын 158-с ыстатыйатын 1 чааһынан («Уоруу») холуобунай дьыала тэрилиннэ. Бу ыстатыйанан буруйдаах киһи 2 сылга диэри көҥүлэ быһыллыан сөп.