Байыаннай дьайыы кыттыылаахтарыгар уонна кинилэр дьиэ кэргэттэригэр суоппарга үөрэммит харчыларын төннөрөллөр

Саха сиригэр анал байыаннай дьайыы бэтэрээннэрин уонна кинилэр дьиэ кэргэттэрин социальнай өйөөһүн салҕанар. Биир сүрүн хайысханан — суоппар быраабыгар үөрэнии ороскуотун толуйуу буолар. Бүгүҥҥү күҥҥэ 49 Саха сирин олохтооҕо маннык көмөнү ылла.

Бу туһунан Дьокуускай куорат Социальнай көмүскэлгэ уонна үлэҕэ управлениетын салайааччыта Матрена Анемподистова иһитиннэрдэ.

Кимнээх харчыларын төннөрөр кыахтаахтарый?

• АБДь кыттыылаахтара (АБДь бэтэрээннэрин дастабырыанньалаахтар);
• АБДь-га бааһыран инбэлиит буолбут байыастар;
• АБДь-га олоҕун толук уурбут буойуннар кэргэттэрэ (ойохторо);
• Инбэлиит буолбут АБДь кыттыылаахтарын кэргэттэрэ.

Бу көмө илиинэн салайыллар массыынаны ыытарга үөрэммит эрэ буоллахха бэриллэр. Ону таһынан, сайабылыанньа биэрээччи Саха сирин олохтооҕо буолуохтаах уонна автооскуоланы кытта дуогабара АБДь саҕаламмытын кэннэ түһэрсиллибит буолуохтаах.

Төһө харчы бэриллэрий?

• Толуйуу муҥутуур кээмэйэ — 53 тыһыынча солкуобайга диэри.
• Бу көмө биирдэ эрэ бэриллэр уонна нолуоктаммат.
• Быйыл бу сыалга 2,8 мөлүйүөн солкуобай көрүллүбүт.

Ханна уонна хайдах сайабылыанньа биэриэххэ сөбүй?

Сайабылыанньаны олорор сиргитинэн «Мин докумуоннарым» кииннэригэр эбэтэр электроннай көрүҥүнэн Госуслуги порталыгар киирэн биэриэххэ сөп. Быһаарыы 15 үлэ күнүн иһинэн тахсар.

Туттарыллар докумуоннар: пасспар, суоппар бырааба, автооскуоланы бүтэрбит туһунан туоһу сурук, үөрэнии дуогабара, төлөбүрү бигэргэтэр кибитээнсийэ уонна бааҥҥа счет реквизиттэрэ.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.

Сиһилии: https://www.sakha.gov.ru/news/68283